Edwein 8 - AHYERƐLƐ KRONGRON

Sona la Nyameɛ ahone nwo

Dawide dwein. Ɔfa mane edweinhyirelɛniɛ ne

¹ Ao AWURADE, yɛ Mene, wɔ dumaa piri paa ne kata aseɛ ye aso amukoraa! Wɔ bɔ w’animnyam wɔ ewienu anwuro anwuro ɔ!

² Ɔnate wɔ pɔfoɛ mɔ ti, yeɛ kyɛbɔ ɔkɔyɛ bɔ ɛkɔhã pɔfoɛ ne ne wereɛtɔlɛniɛ ne bɛ noa kɔto nu ne ati, nnɔma ne ngwadaa mmaa mmaa bɛ noa, yeɛ ɛfa so ma mmenia te w’animnyam nwo dwirɛ ɔ.

³ Sɛ menea w’anwuro anwuro ne, bɔ ɔte wɔ sa noa adwuma ne, ɛsraen ne nzramaa bɔ afa atuatua berɛ a,

⁴ né dasaniɛ te nzu koraa bɔ ɛdwene ye nwo ɔ, yeɛ sona awa te nzu, bɔ ɔla w’ahone nwo ɔ?

⁵ Nakoso amaa wahɔ ase kãa bie watra abɔfo mɔ, na afa animnyam ne anidie abɔ ye abotire.

⁶ Ama ye tumi wɔ wɔ sa noa nnwumaa so, afa nningyein amukoraa awura ye gya bo:

⁷ mmoaen ne nandwie nyii amukoraa, yeɛ eburo ngaka koso,

⁸ ewienu nnomaa, ɛpo nu naen, ɔne kaka biala bɔ ɔla ɛpo nu ɔ.

⁹ Ao AWURADE, yɛ Mene, wɔ dumaa piri paa ne kata aseɛ ye aso amukoraa!