Edwein 79 - AHYERƐLƐ KRONGRON

AWURADE, nwu wɔ maen anwumvoin

Asafe dwein

¹ Ao Nyameɛ, maen maen mɔ bafa koɛ baateta w’agyapadeɛ, bafa efiɛ bahã w’asɔneyɛɛ sua krongron ne, babɔ Yerusalem kuro ne.

² Bafa wɔ somvoɛ mɔ bɛ fuin bama ewienu nnomaa maa bali, bafa w’anwoteefoɛ bɛ naen bama aseɛ so ngaka.

³ Bahã bɛ mogya bagua kyɛ nzue bapɛ Yerusalem nwo bayia, na ebiala nne berɛ bɔ okosie bɛ bɔ batotɔ nemɔ ɔ.

⁴ Yayɛ ngorohoɛ nikyee wɔ yɛ mmango mɔ nye so, bɛ bɔ bapɛ yɛ nwo bayia ne, bɛsere yɛ bɛkã yɛ anyinga.

⁵ Ao AWURADE, ɔkwaapem kyinzu? Aso ɛkɔfɛ yɛ so yaa afebɔɔ anaa? Wɔ nungunɛhwenɛ ne, aso okogye kyɛ see?

⁶ Amaen maen mɔ bɔ bɛnze wɔ ne, bɛ ne ahennie mɔ bɔ bɛmmɔ wɔ dumaa ne, ma w’ahone hu bɛ so paa.

⁷ Ofikyɛ bayɛ Yakob pasapasa, na bama ye atenaleɛ akakyi kurofoen.

⁸ Yɛ nana mɔ amumuyɛɛ ne, nnɛfa ye nwo ngyeleɛ kye yɛ, na nwu yɛ anwumvoin ndɛndɛ, ofikyɛ babrɛ yɛ ase bɔkɔɔ.

⁹ Ao, yɛ ngoalelɛ Nyameɛ, boka yɛ, ɔnate wɔ dumaa nwo animnyam ti; pepɛ de yɛ, ná fa yɛ bɔne kyɛ yɛ, ɔnate wɔ dumaa ti.

¹⁰ Nzu ati yeɛ odi kyɛ maen maen mɔ bebisa kyɛ, “Bɛ Nyameɛ ne, ɔwɔ nisua” ɔ? Wɔ somvoɛ mɔ bɛ mogya so wereɛtɔlɛ ne, ma maen maen mɔ benwu ye bɔ yɛ koso yɛ nye tua ɔ.

¹¹ Ma kukunufoɛ bɛ penenɛ bɔ bɛpene ne, odwu wɔ nyunu; gyina wɔ tumi piri ne aso pepɛ de bɛ bɔ bɛbaahu bɛ ne.

¹² Ao AWURADE, ngorohoɛ bɔ maen maen bɔ bapɛ yɛ nwo bayia bɛgoro wɔ nwo ne, tua bɛ so kerɛ pɛen nzoo.

¹³ Na ɔnate so yɛ bɔ yɛte wɔ maen, mmoaen bɔ yɛdidi wɔ sa nu ne, yɛkɔla wɔ ase afebɔɔ; ofi aworɛ ndoatoasoɛ kɔka aworɛ ndoatoasoɛ, yɛkɔhɔ so yɛkɔye wɔ ayɛ.