Edwein 75 - AHYERƐLƐ KRONGRON

Nyameɛ yeɛ obua wiase amukoraa ndɛen ɔ

Asafe dwein. Ɔfa mane edweinhyirelɛniɛ ne

¹ Yɛda wɔ ase, ao Nyameɛ, yɛda wɔ ase; wɔ dumaa pingye. Wɔ sa noa nnwumaa nwanwa ne, mmenia bɔ ye nwo dawure.

² Sɛ mmerɛ bɔ mahyɛ ne ɔso a, ngɔfa pɛpɛɛpɛyɛlɛ yeɛ ngobua ndɛen ɔ.

³ Sɛ aseɛ ɔne bɔ ɔwɔ so amukoraa bɛwoso a, me yeɛ mema ye bonima mɔ begyina pindinn ɔ. Sela

⁴ Sona bɔ ɔhoahoa ye nwo ne, mekã mekyire ye kyɛ, “Nnɛhoahoa wɔ nwo,” yeɛ mekã mekyire bɔnefoɛ kyɛ, “Nnɛfa wɔ tumi hoahoa wɔ nwo;

⁵ nnɛfa wɔ tumi hoahoa wɔ nwo koraa, yeɛ nnɛdwudwo ahandaen so.”

⁶ Ofikyɛ ngɔsoɛ mvi eyia afiteleɛ anaa eyia atɔleɛ yeɛ ɔba ɔ, yeɛ omvi ngwaen koso,

⁷ na mmom Nyameɛ yeɛ obua ndɛen ɔ: ɔbrɛ ebie ase, ná wapagya ebie koso.

⁸ Ofikyɛ AWURADE tira kwangoa bie wɔ ye sa nu, bɔ nzaa bɔ ye noa yɛ hye, bɔ opu ahure wɔ nu ɔ; okohwie nzaa ne bie, na wiase bɔnefoɛ amukoraa bɛkɔno bekotu ye bo.

⁹ Nakoso me de, ngɔbɔ ye nwo dawure afebɔɔ; ngɔto Yakob Nyameɛ ayɛyelɛ dwein.

¹⁰ Ngotu bɔnefoɛ b’anwoserɛ amukoraa bo, nakoso teneneefoɛ b’anwoserɛ de, ɔkɔhɔ anwuro.