Edwein 72 - AHYERƐLƐ KRONGRON

Dawide bɔ mbaeɛ ma Solomon ahennie

Dawide dwein. Ɔto mane Solomon

¹ Ao Nyameɛ, fa wɔ pɛpɛɛpɛyɛlɛ ne ma ɛhene ne, ná fa wɔ tenenee ne ma ɛhene awa ne.

² Maa ɔfa tenenee obu wɔ maen ne, na ɔfa pɛpɛɛpɛyɛlɛ ɔnea bɛ bɔ bɛyɛ anwumvo ɔ so.

³ Ma mmokaa nemɔ bɛfa asomdwee bɛbrɛ wɔ maen, ná ma pambaa nemɔ koso bɛfa tenenee bɛbra.

⁴ Maa oli maen ne anu ehiafoɛ bɛ dwirɛ ɔma bɛ; maa ɔpepɛ ole bɛ bɔ bɛyɛ anwumvo ɔ, ná obubu aminɛlilɛfoɛ nu gɔsɔgɔsɔ.

⁵ Kyɛ eyia tɛbɔ ye, ɔne kyɛ ɛsraen tɛta ye, ma wɔ maen besuro wɔ wɔ aworɛ ndoatoasoɛ amukoraa nu.

⁶ Ɛhene ne, maa ɔyɛ kyɛ esue bɔ ɔtɔ gua ɛserɛ bɔ bapɛ so ɔ so, kyɛ nyenyenzue bɔ ɔdoadoa aseɛ so ɔ.

⁷ Ye aberɛ so, ma tenenee obu so, ná asomdwee pee ɔbra, kɔpem kyɛ ɛsraen ɔnne berɛ ko ɔ.

⁸ Ma ye ahennie ɔtrɛ fi ɛpo ɔɔhã ɛpo, ofi asue ne ɔɔhã aseɛ noa.

⁹ Ma bɛ bɔ bɛte ɛserɛ so ne bɛkoto wɔ ye nyunu, ná ma ye pɔfoɛ mɔ beli mvuture.

¹⁰ Tasise ahemvo ne dedeede aseɛ ahemvo nemɔ, maa betua ndɔ bɛma ye; ma Hyeba ne Seba ahemvo mɔ bɛfa akyɛdeɛ bɛbrɛ ye.

¹¹ Maa ahemvo amukoraa bɛkoto wɔ ye nyunu, ná maen maen amukoraa bɛso ye.

¹² Ofikyɛ bɛ bɔ bɛyɛ anwumvo, ehiafoɛ ne bɛ bɔ belle bokafoɛ ne, besu bɛfrɛ ye a, ɔkɔpepɛ kole bɛ.

¹³ Okonwu ehiafoɛ ne bɛ bɔ bɛyɛ anwumvo ɔ anwumvoin, na okole ehiafoɛ kra ngoa.

¹⁴ Okole bɛ ngoa kofi nhyɛsoɛ ne nzɛmmɔne nu, na bɛ mogya koli mu wɔ ye nye so.

¹⁵ Maa onyi ɔhyɛ! Maa bɛfa Hyeba esikaa kɔkorɛ bɛma ye. Maa bɛbɔ mbaeɛ bɛma ye daa, ná bɛsrɛ saleɛ bɛma ye daa biala.

¹⁶ Ma aleɛ obu so wɔ aseɛ ne aso, maa aleɛ ɔhye wɔ mmokaa nemɔ aso po, ma ye aleɛ ɔyɛ kyɛ Lebanon; na ma mmenia benyi frɔmfrɔm wɔ nguro nemɔ aso kyɛ aseɛ so ndire.

¹⁷ Ma ye dumaa ɔtena berɛ afebɔɔ, na kyɛ eyia wɔ berɛ ye, maa ɔhɔ so onya dumaa, ma mmenia bɛfa ye so benya saleɛ, na ma maen maen amukoraa bɛfrɛ ye sona bɔ wanya saleɛ ɔ.

¹⁸ Animnyam hã AWURADE Yisrael Nyameɛ, bɔ ye ngome yeɛ ɔyɔ anwanwadeɛ ne.

¹⁹ Ye animnyam dumaa ne, odi kyɛ bɛye ye ayɛ daa, na ma ye animnyam oyi aseɛ ye amukoraa so tɛkyɛ. Amen, Amen.

²⁰ Yese awa Dawide ye mbaeɛ ne, ye ayieleɛ ɛne.