Edwein 71 - AHYERƐLƐ KRONGRON

AWURADE, nnɛye wɔ sa fi me bo

¹ Ao AWURADE, wɔ nu yeɛ mebɔ me nwo waen ɔ; nnɛma me nyunu gua ase le.

² Wɔ tenenee ti, pepɛ de me, ná maa nya me ti nnidi nu. Yɛ asoɛ tie me, ná pepɛ de me.

³ Yɛ me nyɔbotaen bɔ menwati mebafea wɔ nu daa ɔ. Ayɛ nhyehyɛleɛ kyɛ ɛkɔpepɛ ekole me ngoa, ofikyɛ wɔ yeɛ ɛte me nyɔbotaen ne m’anwoserɛ afealeɛ ɔ.

⁴ Ao me Nyameɛ, pepɛ de me fi bɔnefoɛ sa nu, pepɛ de me fi amumuyɛɛfoɛ ne atianuserɛfoɛ sa nu.

⁵ Ofikyɛ ao AWURADE, wɔ yeɛ ɛte m’anyelasoɛ ɔ, ao AWURADE, ofi me ngwadaa nu, wɔ yeɛ me wora wura wɔ nu ɔ.

⁶ Ofi mmerɛ bɔ bɛwole me ɔ, wɔ yeɛ mafa me nwo mato wɔ so ɔ; wɔ yeɛ ɛfale me fili me ni akunu wale ɔ. Ngɔye wɔ ayɛ daa biala.

⁷ Mayɛ kyɛ anwanwadeɛ wɔ mmenia pee nye so, nakoso wɔ yeɛ ɛte m’anwoserɛ afealeɛ ɔ.

⁸ W’ayɛyelɛ ne w’animnyam yeɛ mete me noa mekã ye daa biala ɔ.

⁹ Me nworowaa nu, nnɛyakyi me nu; sɛ menyi meyɛ mmerɛ a, nnɛpo me.

¹⁰ Ofikyɛ me pɔfoɛ mɔ kekã me nwo dwirɛ tɛɛ, na bɛ bɔ bɛtetɛ me beku me ne, bɛbɔ nu betu asure.

¹¹ Bɛkekã kyɛ, “Nyameɛ apo ye, yiti ɛ́mɔfoa ye bɛhye ye, ofikyɛ ongonya defoɛ biala.”

¹² Ao Nyameɛ, nnɛyakyi me nu, ao me Nyameɛ, yɛ ndɛ baaboka me!

¹³ Bɛ bɔ bɛbɔ me kwaadu ne, ma bɛ nyunu gua ase ná bewuwu, bɛ bɔ bɛpena me bepura me ne, ma nyanzoen ne animguaseɛ obia bɛ.

¹⁴ Nakoso me de, ngonya anyelasoɛ daa, na ngɔhɔ so ngɔye wɔ ayɛ.

¹⁵ Wɔ tenenee nnwumaa ne wɔ ngoalelɛ nnwumaa ne, meka bɛ a, ɔbo me ndeaseɛ so de, nakoso ngɔfa me noa ngɔbɔ bɛ nwo dawure mmerɛ biala.

¹⁶ Ngɔwa wɔ AWURADE Nyameɛ anwoserɛ ne anu, wɔ tenenee deɛ angome yeɛ ngɔye ye ayɛ ɔ.

¹⁷ Ao Nyameɛ, ofi me mmerandeɛ nu yeɛ ahyirehyire me ɔ, na mekɔ so mebɔ w’anwanwadeɛ nwo dawure.

¹⁸ Yiti menyi meyɛ aworowaa ma me ti anu yɛ gyein a, ao Nyameɛ, nnɛpo me, kɔpem kyɛ ngɔbɔ w’anwoserɛ nwo dawure ngohyire aworɛ ndoatoasoɛ he, ɔne wɔ tumi nwo dawure ngohyire ebiala bɔ ɔbaawa ɔ.

¹⁹ Ao Nyameɛ, wɔ tenenee kodwu anwuro anwuro. Ao Nyameɛ, wɔ yeɛ ayɛ nnwumaa mbiri mbiri ɔ; nwa yeɛ ɔte kyɛ wɔ ɔ?

²⁰ Wɔ bɔ amaa manwu amaneɛ pee ye, ekosa kɔmaa ngonya ngoa; na ekosa kɔye me kofi aseɛ bo dɔ kɔwa.

²¹ Ɛkɔmaa ngonya animnyam bɔ ɔte piri ɔ, ná ekosa kɔkyekye me wora.

²² Ao me Nyameɛ, ɔnate wɔ nahorɛlilɛ ti, ngosa ngɔbɔ adengum ngɔye wɔ ayɛ; Ao Yisrael Krongronniɛ, ngɔfa sangoo ngɔto wɔ nwo ayɛyelɛ dwein.

²³ Me noa kɔbɔ ese koli ahurusi mmerɛ bɔ meto wɔ nwo ayɛyelɛ dwein ɔ, yeɛ me kra bɔ apepɛ ale ye ne koso, ɔkɔyɔ sɔ ala.

²⁴ Mmerɛ biala, me noa koso kɔhã wɔ tenenee nwo dwirɛ, ofikyɛ bɛ bɔ bɛpena me bepura me ne, bafɛre, na bɛ nyunu agua ase.