Edwein 7 - AHYERƐLƐ KRONGRON

Dawide dwein bɔ ɔto hyirele AWURADE fale Benyaminniɛ Kuse nwo ne

¹ Ao AWURADE me Nyameɛ, wɔ nu yeɛ menwati mebafea ɔ, bɛ bɔ bɛfoa me ne amukoraa, de me fi bɛ sa nu, ná pepɛ de me.

² Wamma ye sɔ a, bɛkɔtete me nu pasapasa kyɛ gyata tete sona nu ɔ, na bɛkɔpoa me ase bɛkɔhɔ bɔ mengonya defoɛ biala ɔ.

³ Ao AWURADE me Nyameɛ, sɛ mayɔ sɔ a, sɛ mayɔ amumuyɛɛ a,

⁴ sɛ mafa bɔne matua sona bɔ ɔne me te asomdwee nu kerɛ, anaakyɛ mafa atee tɛɛ so mafa me pɔfoɛ nningyein a,

⁵ ye de ma me pɔfoɛ ɔfoa me ɔɔto me; maa otiatia me ngoa so wɔ nnɛterɛ nu, ná ɔ́fa me kra owura mvuture nu. Sela

⁶ Ao AWURADE, fɛ yaa ná dwɔso e; kekã wɔ nwo dwɔso tia me pɔfoɛ mɔ b’ɛyaafɛlɛ; ao me Nyameɛ, dwɔso gyina me si, wɔ bɔ ahyehyɛ ndɛenbualɛ ato berɛ ɔ’.

⁷ Ma maen maen so mmenia amukoraa bɛpɛ wɔ nwo beyia, ná tena w’ahennie bia so wɔ bɛ ti so anwuro anwuro.

⁸ AWURADE kobua maen maen mɔ ndɛen. Ao AWURADE, nea me tengyɛlɛ so ɔne nahorɛ bɔ medi so, ná di me dwirɛ ma me.

⁹ Ao bɔnefoɛ b’amumuyɛɛ ne, ma ye bo ɔpɛ, nakoso sona bɔ ɔtengyɛ ne de, ma ye bo otindim. Ao Nyameɛ bɔ ɛtengyɛ ɔ, wɔ yeɛ ɛse mmenia ti anu ne b’ahone nu dwirɛ ɔ.

¹⁰ Nyameɛ te m’akokyɛm, ye yeɛ ɔpepɛ de bɛ bɔ b’ahone nu te ɔ.

¹¹ Nyameɛ te ndɛenbualɛniɛ nahorɛniɛ, ɔne Nyameɛ bɔ ɔfɛ bɔnefoɛ so yaa daa biala ɔ.

¹² Sɛ ebie anzakyera ye adwene a, Nyameɛ kosi ye ngrandɛ ne; wakondo ye agyaen, na wasina.

¹³ Wasiesie ye akodeɛ suronyisuronyi ne, na wasiesie ye agyaen mmakaa bɔ ogye see ne.

¹⁴ Nea, amumuyɛɛniɛ ɔnwonzɛ bɔne, ɔnwonzɛ musue, na ɔwo ngondombo.

¹⁵ Ofu kumaa maa ɔkɔ kuronn, na ɔtɔ ye bɔbɔ ye kumaa bɔ wafu ɔ nu.

¹⁶ Ye musue bɔ ye bɔbɔ ye ti so, na basabasa bɔ wahyehyɛ ne, odwiri gua ye bɔbɔ ye ti so.

¹⁷ AWURADE tengyɛ, yiti ngɔfa asennaa bɔ ɔfata ye ɔ ngɔma ye, na AWURADE bɔ ɔwɔ anwuro anwuro ne, ngɔto dwein ngɔye ye dumaa ayɛ.