Edwein 69 - AHYERƐLƐ KRONGRON

De me fi ndaneanyeɛ nu

Dawide dwein. Ɔfa mane edweinhyirelɛniɛ ne.

¹ Ao Nyameɛ, pepɛ de me, ofikyɛ nzue ne ayi waadwu me kɔme anu.

² Meme mekɔ aseɛnwo wɔ asaa pɛkyɛpɛkyɛ nu, bɔ mennya nekaa memva me gya mendindim ɔ; maadwu buma nu, na asue ne wayi wabu wafa me so.

³ Masu dee mayɛ mmerɛ; me komvi ayɛ wosee. Manea me Nyameɛ ate alaa ama me nye ape atee bo.

⁴ Bɛ bɔ bɛpɔ me mbaen ne, bɛsone bɛtra me ti nwiaa; bɛ bɔ bɛpena me beku me, bɔ bɛ yeɛ bɛpɛ edwirɛ bɛto me so ne, bɛ nwo yɛ se. Nikyee bɔ nnwuale ɔ, aso odi kyɛ mefa bie mesi ye gya nu?

⁵ Ao Nyameɛ, wɔ yeɛ ɛse ngwaseasɛm bɔ mali ɔ; me mvomsoɛ mvea wɔ wɔ nyunu.

⁶ Ao AWURADE, Asafo Nyameɛ, bɛ bɔ bɛ wora wura wɔ nu ne, nnɛmaa ɔnate me ti bɛ nyunu gua ase; ao Yisrael Nyameɛ, bɛ bɔ bɛpena wɔ si atee ne, nnɛmaa ɔnate me ti animguaseɛ kã bɛ.

⁷ Ɔnate wɔ ti yeɛ male animguaseɛ ye, animguaseɛ bɔ ɔmata me ye.

⁸ Makakyi ɛwɔfoɛ wɔ nniɛma mɔ nu, mayɛ amanvraniɛ wɔ me ni akunu mmaa mɔ nu.

⁹ Ofikyɛ w’awuro nwo ɔdɔ bɔ nne ye ne, ɔte see bɔ ogye wɔ me nu ɔ, bɛ bɔ bɛbɔ wɔ alapaa ne, b’alapaa ne waagua me so.

¹⁰ Mmerɛ bɔ nyɔle akɔngyere mva mmrɛle me kra ase ne, ɔnate so maa bɛbɔle me alapaa.

¹¹ Mmerɛ bɔ mvale ɛsɛen tena nyɛle me tena ne, ngakyili bɛ noa nu ngorohoɛ dwirɛ.

¹² Bɛ bɔ bɛwɔ kuro berɛ pambim ne anu ne, me nwo dwirɛ ala yeɛ bɛkã ɔ, na me yeɛ akɔnomnzafoɛ bɛfa me bɛto dwein ɔ.

¹³ Nakoso, ao AWURADE, me de, wɔ yeɛ mebɔ me mbaeɛ mekyire wɔ ɔ. Ao Nyameɛ, mmerɛ bɔ ɔsɛ ɔ nu, wɔ ɔdɔ totohyia bɔ onni ngasi ne ati, bua me. Wɔ ngoalelɛ bɔ onni ngasi ne ati,

¹⁴ pepɛ de me, amaa ɔnate so mammi wɔ asaa pɛkyɛpɛkyɛ ne anu; pepɛ de me fi me pɔfoɛ mɔ sa nu, ɔne buma ne anu.

¹⁵ Nnɛma nzueyilɛ ne obungam fa me so, nnɛma buma ne ɔme me, yeɛ nnɛma ɛborɔ kumaa ne noa ɔkã tua sie me.

¹⁶ Ao AWURADE,‘ tie me, ofikyɛ wɔ ɔdɔ bɔ onni ngasi ne, ɔte paa; gyina w’anwumvoinnwunɛ kandinga ne aso, ná pɛne wɔ nye baanea me.

¹⁷ Nnɛye wɔ nye fea wɔ somvoɛ, ofikyɛ edwirɛ ato me, yiti yɛ ndɛ bua me.

¹⁸ Twe pingye me kra, pepɛ de me, me pɔfoɛ mɔ ati, maa nya me nwo ndete.

¹⁹ Ɛse alapaa bɔ bɛbɔ me ɔ, yeɛ m’animguaseɛ ne me ɛsopalɛ, ɛse me pɔfoɛ mɔ amukoraa.

²⁰ Alapaa ama me wora abɔ, maa ɔnate so wabɔ me anwonyerɛ. Ahaa mepena sona bɔ ɔkɔdodo me ɔ, nakoso mbaen ɔ; yeɛ ahaa mepena aworakyekyerɛfoɛ, nakoso mannya ko po.

²¹ Bɛfale ɛborɔ beguale m’aleɛ nu, yeɛ nzuhɔen ku me ne, bɛmane me nzaa kekarekekare kyɛ nno.

²² Bɛ bɔbɔ bɛ poen bɔ bato ne, maa ɔkakyi bɛ so ngaen; ma bɛ nwo waenbɔlɛ ne, ɔkakyi bɛ so kafoli.

²³ Ma bɛ nye so yɛ tunn bɔ bennwu hwee ɔ, ná ma bɛ sisia ɔpo bɛ tɛtɛtɛtɛ daa.

²⁴ Ma wɔ nye boro bɛ so, ná ma wɔ yaa bɔ afɛ ye hahii ne ɔhɔ bɛ so.

²⁵ Ma b’atenaleɛ ɔkakyi kurofoen, yeɛ nnɛma ebiala tena b’ɛtena sua nemɔ anu.

²⁶ Ofikyɛ sona bɔ abɔ ye apura ye ne, bɛtane ye nye, na bɛ bɔ apura bɛ ne, besa bɛmaa bɛfa yealɛ nu.

²⁷ Ma bɛ so hwenɛ ne, ɔtaataa so, nnɛmaa bennya wɔ sa nu bɔnefakyɛ.

²⁸ Kyikyi bɛ dumaa fi ateasefoɛ nwomaa ne anu; nnɛmaa bɛka bɛ bɛfra teneneefoɛ.

²⁹ Na me de, nwɔ amaneɛ nu, yeɛ medi aworabɔlɛ; ao Nyameɛ, wɔ ngoalelɛ ne, maa ɔpagya me.

³⁰ Ngɔto dwein ngɔye Nyameɛ dumaa ayɛ, ngɔfa asennaa ngɔhyɛ ye animnyam.

³¹ AWURADE kohuro ɛhe kɔtra nandwie, anaa nandwie nyii bɔ ole mmɛen bɔ ye gya nu apakye ɔ.

³² Anwobrɛaseɛfoɛ bekonwu ye na bɛ nye kɔgye; ɛmɔ bɔ ɛmɔpena Nyameɛ si atee ne, ɛ́mɔma ɛmɔ wora ɔ́kyekye.

³³ Ofikyɛ AWURADE tie ehiafoɛ sufrɛ, ná ye mmenia bɔ bɛwɔ amaneɛ nu ne, ommu bɛ animtia.

³⁴ Ma nyameɛso ne aseɛ, yeɛ ɛpo ne nu ngaka amukoraa bɛye ye ayɛ.

³⁵ Ofikyɛ Nyameɛ kɔpepɛ kole Sion, na okosa kɔkyekye Yuda nguro nemɔ, na bɛkɔtena berɛ bɛkɔfa berɛ bɛkɔyɛ bɛ deɛ.

³⁶ Ye somvoɛ mɔ, bɛ mma mɔ kɔfa berɛ bɛkɔyɛ b’agyapadeɛ, na bɛ bɔ bɛ nye gye ye dumaa nwo ne, bɛkɔtena so.