Edwein 68 - AHYERƐLƐ KRONGRON

Ayɛyelɛ ne asennaa mbaeɛ

Dawide dwein. Ɔfa mane edweinhyirelɛniɛ ne

¹ Nyameɛ, dwɔso, ná ma wɔ pɔfoɛ mɔ bɛbɔ aya; bɛ bɔ bekyi wɔ ne, maa bɛnwati befi wɔ nyunu.

² Kyɛbɔ mvrama bɔ nwosina kɔ ne, sɔ ala yeɛ foa bɛ maa bɛhɔ ɔ; ao Nyameɛ, kyɛbɔ sakyeɛ huro wɔ see nu ne, sɔ ala yeɛ maa bɔnefoɛ bewuwu wɔ wɔ nyunu ɔ.

³ Nakoso teneneefoɛ de, ma bɛ nye ɔgye, maa beli ahurusi wɔ Nyameɛ nyunu; maa benya anigye mmorosoɛ.

⁴ Ɛ́mɔto Nyameɛ nwo dwein, ɛ́mɔto ye dumaa nwo ayɛyelɛ dwein, ɛ́mɔpɛ atimbire bɛ́ma bɔ ɔte nikyee so ɔnate munungum so ne; ye dumaa ole AWURADE, na ɛmɔli ahurusi wɔ ye nyunu.

⁵ Ayisiaafoɛ baba ne akunafoɛ neafoɛ, ye ole Nyameɛ bɔ ɔwɔ ye atenaleɛ krongron nu ne.

⁶ Nyameɛ yeɛ ɔma sona bɔ olle bie ɔ awuro maa ɔtena nu ɔ; ɔye kukunufoɛ fite maa oyie bɛ yé, nakoso ɛlɔenyɛlɛfoɛ de, bɛtena aseɛ katerepee so.

⁷ Ao Nyameɛ, mmerɛ bɔ elili wɔ maen nyunu, bɔ ɛnate fale ɛserɛ so ne, Sela

⁸ aseɛ wosole, na nyameɛso tɔle esue guale ase wɔ Nyameɛ, Yisrael Nyameɛ nyunu, na Sinai wosole wɔ Nyameɛ nyunu.

⁹ Ao Nyameɛ, ɛmane esue tɔle pee guale nekaa biala; ɛfa siesiele w’agyapadeɛ mmerɛ bɔ ɔyɛle basaa ne.

¹⁰ Wɔ mmenia nyane nekaa wɔ so bɛtenane; ao Nyameɛ, wɔ paa ti ɛmane ehiafoɛ bɛ sa hane bɔ behia ɔ.

¹¹ AWURADE fa ye noa dwirɛ ne ɔma, na bɛ bɔ bɛbɔ ye nwo dawure ne, bɛsone pee.

¹² “Koɛhonɛfoɛ b’ahemvo mɔ bɛnwatinwati!” Mmrasua bɔ bɛwɔ awuro yeɛ bɛkyɛ koɛ nu nzesadeɛ ne ɔ,

¹³ ɔwɔ nu kyɛ bɛlela mmoaennduin nu de, nakoso bɛte kyɛ abubure bɔ ɛdwetɛ kata ye ndaa nwo, ye ndɛkra te kyɛ esikaa kɔkorɛ bɔ ɔte yerɛmyerɛm ɔ.

¹⁴ Mmerɛ bɔ Ɛdangama bɔle ahemvo mɔ sandene wɔ berɛ ne, ɔyɛle kyɛ asukɔtwea wɔ Salmon bokaa so.

¹⁵ Nyameɛ bokaa, Basan bokaa; mmokaa ndendenn, Basan bokaa!

¹⁶ Mmokaa ndendenn, nzu ati yeɛ ɛmɔ nye boro bokaa bɔ Nyameɛ kuro kyɛ ɔfa yɛ ye atenaleɛ ne ɔ? Amba, nekaa bɔ AWURADE kɔtena afebɔɔ ne.

¹⁷ Nyameɛ ye teaseɛnam mɔ bɛte apee aburanyɔ sɔ alaa buburugyaa, AWURADE boka bɛ so, kyɛbɔ ɔboka bɛ so wɔ Sinai, nekaa krongron berɛ ne.

¹⁸ Ɛfole bokaa tendenn ne, elili bɛ bɔ ahye bɛ nnure ne nyunu wɔ mmerɛ bɔ elele akyɛdeɛ bɔ ɔte mmenia ɔ, bɔ ɛlɔenyɛlɛfoɛ po bɛboka so ɔ amaa ɔnate so AWURADE Nyameɛ watena bɛ nu.

¹⁹ Animnyam hã AWURADE bɔ otira yɛ nu daa biala ne; Nyameɛ yeɛ ɔte yɛ ngoadefoɛ ɔ. Sela

²⁰ Yɛ Nyameɛ ne ɔte ngoalelɛ Nyameɛ, na Nyameɛ, bɔ ɔte AWURADE ne, ye yeɛ ɔpepɛ de sona fi ewue nu ɔ.

²¹ Nakoso Nyameɛ ye pɔfoɛ mɔ de, ɔkɔpɛkyɛ bɛ ti, bɛ bɔ bɛnate bɔne atee so ne, ɔkɔpakyepakye bɛ ti kwangoa.

²² AWURADE nwa: “Ngosa ngɔfa bɛ ngofi Basan ngɔwa, ngosa ngɔye bɛ ngofi ɛpo ye bo dɔ paa ngɔwa,

²³ amaa ɔnate so afa wɔ pɔfoɛ mɔ bɛ mogya anwunzi wɔ gya bo, ná wɔ ngyea mɔ bɛ temverema anya mogya ne bie batafe.”

²⁴ Ao Nyameɛ, yanwu wɔ sandene krongron ne, sandene bɔ me Nyameɛ bɔ ɔte me hene ne, ɔto kɔ nekaa krongron berɛ ne.

²⁵ Edweintolɛfoɛ nemɔ li moa, sangoobɔlɛfoɛ nemɔ li nziɛ, ndaluwa li bɛ nu bɛwoso akasaa kyɛ,

²⁶ “Ɛ́mɔhyɛ Nyameɛ animnyam wɔ badwa kandinga ne anu, ɛmɔ bɔ Yisrael suli ɛmɔ ne, ɛ́mɔhyɛ AWURADE animnyam!”

²⁷ Benyamin bɔ yeɛ ɔte abusua kure kaaba paa ne, ye yeɛ oli bɛ nyunu ɔ; Yuda mbanyi baboa bɛ noa, Sebulɔn mbanyi, Nafetali mbanyi.

²⁸ Ao Nyameɛ, kyire wɔ tumi, ao Nyameɛ, kyire w’anwoserɛ, kyɛbɔ ɛyɛ mane yɛ daa ne.

²⁹ Ɔnate w’asɔneyɛɛ sua bɔ ɔwɔ Yerusalem ne ati, ahemvo kɔbrɛ wɔ akyɛdeɛ.

³⁰ Ngaka aboyaa bɔ bɛwɔ nekaa bɔ elemmire wɔ ne, nandwie nyii kure bɔ bafra maen maen nandwie mmaa mɔ nu ne, twi bɛ nyunu. Bɛ bɔ ndɔlelɛ yɛ bɛ fɛ ne, fa bɛ wura wɔ gya bo, bɛ bɔ bɛ nye gye koɛ nwo ne, bɔ bɛ sande.

³¹ Atitire kofi Misraim kɔwa; Yitiopia kɔyɛ ndɛndɛ kɔma ye sa so kohyire Nyameɛ.

³² Aseɛ so ahennie mɔ, ɛ́mɔto Nyameɛ nwo dwein; ɛ́mɔto AWURADE nwo ayɛyelɛ dwein. Sela

³³ Bɔ ɔnate ewienu anwuro anwuro, tetetete nyameɛso ne, ɛ́mɔto ye nwo dwein; ɛ́mɔtie, ye komvi piri ne, ɔbɔ nu kurudududu.

³⁴ Nyameɛ bɔ odi Yisrael so hene, bɔ ye tumi wɔ ewienu ne, ɛmɔhã kyɛ ole tumi.

³⁵ Ao Nyameɛ, wɔ nwo yɛ suro wɔ w’atenaleɛ krongron berɛ. Yisrael Nyameɛ ne, ye yeɛ ɔma ye maen tumi ne anwoserɛ ɔ. Animnyam hã Nyameɛ!