Edwein 65 - AHYERƐLƐ KRONGRON

Dawide dwein. Ɔfa mane edweinhyirelɛniɛ ne

¹ Ao Nyameɛ, ayɛyelɛ fata wɔ wɔ Sion, na wɔ yeɛ bekotua aboadeɛ bɛkɔma wɔ ɔ’.

² Ao, wɔ bɔ etie mbaeɛ ɔ, wɔ berɛ yeɛ mmenia amukoraa bɛkɔwa ɔ.

³ Sɛ m’amumuyɛɛ bungam fa me so a, wɔ yeɛ ekyikyi m’amumuyɛɛ efi me so ɔ.

⁴ Bɛ bɔ ɛneanea nu ɛtwe bɛ bata wɔ nwo, kyɛ bɛɛtena w’abrannaa nu ne, benya saleɛ. W’awuro bɔ yeɛ ole w’asɔneyɛɛ sua krongron ne, nu nningyein paa ne, ɔma yɛ nwo tɔ yɛ.

⁵ Ɛnate anwanwadeɛ nningyein bɔ ɔtengyɛ so ɛma yɛ mmuayɛɛ; ao yɛ ngoalelɛ Nyameɛ, wɔ yeɛ ɛte anyelasoɛ ma aseɛ ti kɔka ye ti amukoraa, ɔne ɛpo nziɛ nziɛ dɔ paa ɔ.

⁶ W’anwoserɛ yeɛ ɔfale mmokaa penapenane berɛ ɔ, afa tumi abɔ abɔsoɛ.

⁷ Ɛpo bɔ obu fa so ne, ye asorɔkye wuruwuru ne, ɔne maen maen mɔ bagyabagyayɛle ne, ɛmaa bɛyɛ konn.

⁸ Bɛ bɔ bɛte aseɛ noa dɔ dedeede ne, wɔ nzɛngyerɛnneɛ ma ɛserɛ tɔ bɛ so. Ɛma eyia afiteleɛ ne eyia atɔleɛ maen maen mɔ bele ahurusi bɛbɔ ese.

⁹ Ɛba bapasa aseɛ ye anwo, na eguagua so nzue, ɛmaa nningyein paa ba so. Nyameɛ asue ne, nzue ayi ye to, ɛmaa yɛnya aleɛ yɛdi, ofikyɛ wɔ yeɛ ahyehyɛ ye sɔ ɔ.

¹⁰ Ɛtɔ nzue gua ye ngofie nemɔ aso, na etuatua aseɛ ngumaa nemɔ; ɛma bosue doadoa aseɛ ne aso maa ɔyɛ mmerɛ, na eyira so nningyein maa ɔyɛ yé.

¹¹ Sɛ afoɛ ne ba ayieleɛ a, ɛma bɛ sa noa adwuma yɛ yé, na nekaa bɔ ɛkɔpɛ nu ne, né aleɛ poroporo gua.

¹² Bɛporoporo begua ɛserɛ so nekaa bɔ ngaka didi ɔ, na pambaa nemɔ fa anigye bɛkera.

¹³ Nekaa bɔ ngaka didi nemɔ, mmoaen ayi so tɛkyɛ, bɔnza nemɔ anu, aburoo ayi bɛ nu tɛkyɛ, na bɛbɔ ese bɛto dwein bedi ahurusi.