Edwein 64 - AHYERƐLƐ KRONGRON

AWURADE, bɔ me nwo waen

Dawide dwein. Ɔfa mane edweinhyirelɛniɛ ne

¹ Ao Nyameɛ, tie me mbaeɛ wɔ me dwirɛ yealɛ bɔ mekã ye anu; bɔ me ngoa nwo waen fi me pɔfoɛ nwo suronyi nu.

² Bɔnefoɛ bɛ porɛ bɔ bɛbɔ ye mvealeɛ nu ne, bɔ me nwo adwaa fi nu, de me fi amumuyɛɛfoɛ bɛ kanda atee nu.

³ Bɛ yeɛ besi bɛ noa kyɛ ngrandɛ, besina bɛ noa dwirɛ yeayea kyɛ agyaen;

⁴ amaa ɔnate so batetɛ bato basina teneneeniɛ, na bɛto bɛwɔ ye mvum nu bɔ benzuro ɔ.

⁵ Bɛhyehyɛ bɛ nwo nguraen wɔ bɔneyɔlɛ nu, bɛbɔ porɛ besua mmenia ngaen wɔ mvealeɛ nu, na bɛdwene kyɛ, “Nwa yeɛ okonwu yɛ ɔ?”

⁶ Bɛpena amumuyɛɛ bɛyɔ, na bɛbɔ mmɔden bɛyɔ amumuyɛɛ ne. Nahorɛ nu, kuro sona ti anu adwene, ɔne adwene nu nzusuleɛ bɛ nu pi!

⁷ Nakoso Nyameɛ kɔto ye agyaen ne kɔwɔ bɛ, na bekopura mvum nu.

⁸ Bɛ noa dwirɛ ti, ɔkɔmaa amaneɛ kɔto bɛ, na ebiala bɔ okonwu bɛ ne, ye nwo kodwiri ye.

⁹ Afei ɛserɛ kɔtɔ mmenia amukoraa so, na bɛkɔbɔ bɔ Nyameɛ wayɔ ɔ nwo dawure, ná badwene bɔ wayɔ ɔ nwo.

¹⁰ Teneneefoɛ bekoli ahurusi wɔ AWURADE nu, na bɛkɔbɔ bɛ nwo adwaa wɔ ye nu. Bɛ bɔ b’ahone nu te sannwuu ne, bɛkɔhoahoa bɛ nwo.