Edwein 62 - AHYERƐLƐ KRONGRON

Nyameɛ ngome twe yeɛ ɔbɔ yɛ nwo waen ɔ

Dawide dwein. Ɔfa mane edweinhyirelɛniɛ ne

¹ Nyameɛ ngome yeɛ me kra ayɛ konn bɔ ye nye la ye so ɔ, na ye berɛ yeɛ me ngoalelɛ fi ba ɔ.

² Ye ngome yeɛ ɔte me nyɔbotaen ne me ngoalelɛ ɔ, m’anwoserɛ afealeɛ ɛne; hwee ngopusu me.

³ Ɔkwaadwu kyinzu yeɛ ɛmɔkotu ɛmɔ nye bekosie sona horɛ so ɔ, bɔ ɛmɔ amukoraa ɛmɔpena ye beku ye ɔ, kyɛbɔ ɛmɔdwiri fasue bɔ wahyea ɔ begua ase ɔ.

⁴ Bɛ botaeɛ ala ole kyɛ bekotu ye bekofi bia so ɔ. Bɛ nye gye ngondombo nwo; bɛfa bɛ noa beyira sona, nakoso bɛ ti anu de, bɛnoma ye. Sela

⁵ Me kra, Nyameɛ ngome yeɛ ma wɔ nye ɔla ye so ɔ, na ye berɛ yeɛ m’anyelasoɛ fi ba ɔ.

⁶ Ye ngome yeɛ ɔte me nyɔbotaen ne me ngoalelɛ ɔ, m’anwoserɛ afealeɛ ɛne; hwee ngopusu me.

⁷ Nyameɛ sa nu yeɛ me ngoalelɛ ne m’animnyam wɔ ɔ; Nyameɛ yeɛ ɔte m’afealeɛ ɔ; me nyɔbotaen bɔ ɔma me anwoserɛ ɔ.

⁸ Ao kuro mmenia, odi kyɛ ɛmɔfa bɛ nwo bɛto ye so mmerɛ biala, ná ɛ́mɔfa ɛmɔ ahiasɛm bɛto ye nyunu, ofikyɛ Nyameɛ te y’afealeɛ. Sela

⁹ Adasa mmaa te mvrama, yeɛ kuro mmenia te nnakannaka nikye; sɛ bɛkari bɛ wɔ tonyi so a, bɛ nu nyɛ no, sɛ ɛfa bɛ munyɔ bɔ nu a, bɛ nu yɛ nyera tra mvrama.

¹⁰ Nnɛma ɛmɔfa ɛmɔ nwo bɛto apoobɔlɛ so, yeɛ nnɛma ɛmɔ nye gye awue nwo; sɛ ɛmɔ anwonyadeɛ sone po a, nnɛma ɛmɔfa bɛ nwo bɛto so.

¹¹ Nyameɛ dwudwole komapɛ, na mate ye pɛen nyɔ so kyɛ, Tumi te Nyameɛ deɛ’.

¹² Na wɔ, ao AWURADE, ɔdɔ bɔ onni ngasi ne te wɔ deɛ, na etua sona biala kerɛ kyɛbɔ ye nnwumaa te ɔ.