Edwein 61 - AHYERƐLƐ KRONGRON

AWURADE bɔ yɛ nwo waen

Dawide dwein. Ɔfa mane edweinhyirelɛniɛ ne kyɛ bɛfa sangoo bɛto

¹ Ao Nyameɛ, tie me sufrɛ, tie me mbaeɛ.

² Sɛ m’abasa nu bu a, mvi aseɛ noa dɔ yeɛ mesu mefrɛ wɔ ɔ. Di me nyunu fa me kɔ nyɔbotaen bɔ ɔwale tra me ne anwo,

³ ofikyɛ wɔ yeɛ ɛte m’afealeɛ ɔ, abandenden serɛserɛ bɔ ɔko tia me pɔfoɛ ɔ.

⁴ Ngɔtena wɔ tena sua ne anu afebɔɔ, ná manya afealeɛ wɔ wɔ ndaa bo fɔnwoo ne abo. Sela

⁵ Ofikyɛ wɔ, Nyameɛ, ate me bɔhyɛ ne, bɛ bɔ besuro wɔ dumaa ne, afa b’agyapadeɛ ama me.

⁶ Ma ɛhene ne ye ngoa ɔyɛ tendenn, na ye afoɛ mɔ ɔyɛ tendenn oodwu aworɛ ndoatoasoɛ amukoraa nu!

⁷ Maa oli bia afebɔɔ wɔ Nyameɛ nyunu; ma ɔdɔ bɔ onni ngasi ne, ɔne nahorɛlilɛ bɛbɔ ye nwo waen!

⁸ Yiti ngɔto wɔ dumaa nwo ayɛyelɛ dwein daa, ná matua m’aboadeɛ daa biala.