Edwein 60 - AHYERƐLƐ KRONGRON

Ngonimlilɛ nwo mbaeɛ

Dawide dwein. Ɔfa mane edweinhyirelɛniɛ ne. Ɔto fale koɛ bɔ ɔne Aram Naharaim ne Aram Soba bɛhone ne anwo, ɔne mmerɛ bɔ Yoabo huni Edomfoɛ apee buru ne nyɔ wɔ Ngyee Bɔnza nu ne anwo.

¹ Ao Nyameɛ, apo yɛ, abɔ yɛ asande; afɛ yaa, ao yɛsrɛ wɔ, maa yɛpe yɛ daa nu!

² Ama aseɛ awoso, adwa aseɛ nu; fa ye nekaa bɔ wadwudwa nemɔ siesie ye nye, ofikyɛ ɔkekã.

³ Ama amaneɛ paa yeɛ wato wɔ maen ɔ, ama yɛ nzaa maa yano bɔ yɛnate fofalifofali ɔ.

⁴ Bɛ bɔ besuro wɔ ne, asi frangaa ama bɛ, kyɛ bɛfa behyire, ɔnate nahorɛ ti. Sela

⁵ Kyɛbɔ ɔkɔyɛ ná ɛkɔpepɛ kole bɛ bɔ ekuro bɛ dwirɛ ne ati, fa wɔ sa famaa ne de yɛ ngoa, ná tie yɛ.

⁶ Nyameɛ ahã ye wɔ ye nekaa krongron berɛ kyɛ, “Ngoli ahurusi, ngɔhyehyɛ Sɛkem nu, na ngosusu Sukote bɔnza ne.

⁷ Gileade te me deɛ, yeɛ Manase koso te me deɛ; Efraim te me buralɛ kyerɛ; Yuda te me hɔtɔ.

⁸ Moabo te me nyanzɛen, Edom so yeɛ mefindi me mbaboa megua ɔ; na Filistia so yeɛ mebɔ ngonimlilɛ ese ɔ.”

⁹ Kuro bɔ bato ye nwo fasue ne, nwa yeɛ ɔkɔfa me kɔhɔ so ɔ? Nwa yeɛ odi me nyunu fa me kɔ Edom ɔ?

¹⁰ Ao Nyameɛ, aso ɛppole yɛ anaa? Ao Nyameɛ, aso ɛyyakyili yɛ koɛhonɛfoɛ bɛ si gyinalɛ anaa?

¹¹ Ao, boka yɛ de yɛ fi amaneɛ nu, ofikyɛ kuro sona mmokalɛ te mbaen!

¹² Sɛ AWURADE boka yɛ so a, yɛkoli ngonim; ye yeɛ okotiatia yɛ pɔfoɛ mɔ so ɔ.