Edwein 6 - AHYERƐLƐ KRONGRON

AWURADE, de me fi anwonyerɛ nu

Dawide dwein. Ɔfa mane edweinhyirelɛniɛ ne kyɛ bɛfa sangoo bɛto

¹ Ao AWURADE, nnɛkã me nyunu wɔ wɔ yaafɛlɛ nu, yeɛ nnɛtwe me so wɔ wɔ yaafɛlɛ piri nu.

² Ao AWURADE, nwu me anwumvoin, ofikyɛ menwu amaneɛ. Ao AWURADE, sa me anwonyerɛ, ofikyɛ me mmowue nu tutu me.

³ Me kra afokyɛ, na ao AWURADE, ɔkwaadwu kyinzu?

⁴ Sa bra, ao AWURADE, de me kra ngoa; pepɛ de me, ɔnate wɔ ɔdɔ bɔ onni ngasi ne ati.

⁵ Ofikyɛ sona wu a, ɔngora ngaye wɔ; nwa yeɛ ɔkɔhora kɔye wɔ ayɛ wɔ ɛborɔ ɔ?

⁶ Ɛpenenɛ amaa mayɛ hodwoo; kɔngɔen biala, ɛmoen ma me bɛen doa fotii, na me suɛ ma me mba doa.

⁷ Aworabɔlɛ ama me nye ayɛ samɔnn, na ɔnate me pɔfoɛ amukoraa bɛ ti, me nye ayɛ musinamusina.

⁸ Ɛmɔ amumuyɛɛfoɛ amukoraa, ɛ́mɔfi me so bɛhɔ, ofikyɛ AWURADE ate me suɛ ne.

⁹ AWURADE ate me sufrɛ; AWURADE kole me mbaeɛ ne kɔto nu.

¹⁰ Me pɔfoɛ mɔ amukoraa, bɛ nyunu kogua ase, ná ahunundetelɛ atɔ bɛ so paa; bekosa bɛ si, na bɛ nyunu kogua ase mvum nu.