Edwein 58 - AHYERƐLƐ KRONGRON

Nyameɛ tɔ pɔfoɛ so wereɛ

Dawide dwein. Ɔfa mane edweinhyirelɛniɛ ne.

¹ Ɛmɔ, tumifoɛ mɔ, edwirɛ bɔ ɛmɔka ne, aso ɔtengyɛ? Ao kuro mmenia, aso ɛmɔbua ndɛen turoloo?

² Daabi, bɔne yeɛ ɛmɔsusu ye nwo ɛmɔ ti anu ɔ, na nzɛmmɔne yeɛ ɛmɔdi ye wɔ aseɛ ye aso ɔ.

³ Bɔnefoɛ befi bɛ ni akunu yeɛ bedi makyebu ɔ; befi b’aworɛ nu yeɛ bɛyɔ mvomsoɛ ɔ, na bɛnga nahorɛ.

⁴ Bɛ noa borɔ te kyɛ ewoo deɛ ne ala, bɛte kyɛ ɛbɔnaa asotiniwaa bɔ watuatua ye so,

⁵ amaa sɛ bɛ bɔ bele ewoo ayire, anaa bɛ bɔ bɛdwumva ewoo mɔ po bɛtea ye a ɔnde ɔ.

⁶ Ao Nyameɛ, bubu bɛ gye bɔ ogua bɛ noa nu ɔ, ao AWURADE, tutu gyata akrɔngrɔma nemɔ bɛ gye!

⁷ Maa betu bemini kyɛ nzue bɔ ɔse ɔ, maa betiatia bɛ so, ná bɛkese kyɛ ɛserɛ.

⁸ Maa bɛyɛ kyɛ ebuhye bɔ ɔporɔ wɔ ye konguroma nu ɔ, kyɛ baa bɔ bapɔ ye, bɔ wannwu eyia le ɔ.

⁹ Ole ɛyaa kɔpra teasefoɛ kɔhɔ kyɛ mvrama bɔ ɔpɛ ye nwo ɔ, na ɔkɔyɔ sɔ ndɛndɛ kɔtra kyɛbɔ wɔ kukue bɔ ogyi mmowue see so ɔ okosi kɔyɛ hye ɔ.

¹⁰ Teneneeniɛ nwu kyɛ batɔ bɔnefoɛ so wereɛ a, ye nye gye; okonwunzi ye gya bo wɔ bɔnefoɛ mogya nu.

¹¹ Mmenia kɔhã kyɛ, “Amba, akatuaa wɔ berɛ ma teneneefoɛ; amba, Nyameɛ bɔ obua ndɛen wɔ aseɛ ye aso ne, ɔwɔ berɛ.”