Edwein 57 - AHYERƐLƐ KRONGRON

AWURADE baaboka me

Dawide dwein. Ɔfa mane edweinhyirelɛniɛ ne. Ɔhyerɛ fale mmerɛ bɔ ɔnwati fili Sɔɔlo nyunu wɔ nyɔboɛ bɔ wasi sua ne anu ne anwo

¹ Nwu me anwumvoin, ao Nyameɛ, nwu me anwumvoin, ofikyɛ wɔ nu yeɛ me kra nwati bafea ɔ; wɔ ndaa ne abo fɔnwoo ne anu yeɛ menwati mebafea ɔ, kɔpem kyɛ asetena nu mvrama piri ne abo kɔpɛ nu kɔhɔ ɔ.

² Mesu mefrɛ Anwuro Anwuro Nyameɛ, Nyameɛ bɔ ɔma ye nhyehyɛleɛ ba nu ma me ne.

³ Ɔkɔsoma kofi nyameɛso kɔɔpepɛ kole me, na bɛ bɔ bɛpena me beku me ne, okogua bɛ nyunu ase. Sela Nyameɛ kɔsoma ye ɔdɔ bɔ onni ngasi ne, ɔne ye nahorɛlilɛ ne.

⁴ Gyata mɔ yeɛ me kra la b’afia ɔ. Bɛ gye te pealɛɛ ne agyaen, bɛ temverema te ngrandɛ nnaennaen.

⁵ Ao Nyameɛ, kyire kyɛbɔ esi te piri ɔ wɔ anwuro anwuro! Ma w’animnyam kata aseɛ ye aso amukoraa.

⁶ Basua me ngaen, me kra wora abɔ. Betuli kumaa wɔ m’atee nu, nakoso bapɛ bɛ nwo batete bagua nu. Sela

⁷ Ao Nyameɛ, m’ahone asiesie ye nwo, m’ahone asiesie ye nwo! Ngɔto dwein ngɔye wɔ ayɛ.

⁸ M’animnyam, tingye! Sangoo ne adengum, ɛ́mɔtingye! Me koso ngotingye alebahyene.

⁹ Ao AWURADE, ngɔfa asennaa ngɔma wɔ wɔ maen maen mɔ nu; ngɔto wɔ nwo ayɛyelɛ dwein wɔ maen nemɔ anu.

¹⁰ Ofikyɛ wɔ ɔdɔ bɔ onni ngasi ne, ye piri kɔka ewienu dɔ paa, yeɛ wɔ nahorɛlilɛ ne, okodwu munungum nemɔ anu.

¹¹ Ao Nyameɛ, kyire kyɛbɔ esi te piri ɔ wɔ anwuro anwuro. Ma w’animnyam kata aseɛ so amukoraa.