Edwein 56 - AHYERƐLƐ KRONGRON

Fa wɔ nwo to AWURADE so

Dawide dwein. Ɔfa mane edweinhyirelɛniɛ ne. Ɔhyerɛle fale mmerɛ bɔ Filistifoɛ bɛhyele ye wɔ Gate ne anwo.

¹ Ao Nyameɛ, nwu me anwumvoin, ofikyɛ mmenia bɛpena me beku me. Mmerɛ biala me pɔfoɛ mɔ tane me nye,

² mmerɛ biala, me pɔfoɛ mɔ bɛpena me beku me; na mmeni pee bɛyɛ anwomasoɛ bɛko betia me.

³ Sɛ esuronyi tɔ me so a, mefa me wora mewura wɔ nu.

⁴ Nyameɛ bɔ meye ye dwirɛ ne ayɛ ne, Nyameɛ yeɛ mefa me wora mewura ye nu ɔ, yiti menzuro hwee; nzikyɛ yeɛ kuro sona kɔhora kɔfa kɔyɔ me ɔ?

⁵ Daa biala bɛpena kyɛ me noa tɔ, me nwo porɛ alaa yeɛ bɛbɔ ɔ.

⁶ Bɛboa bɛ noa, bɛtetɛ me; beli me mvanvando, na bɛpena me ne ewue.

⁷ Yiti tua bɛ bɔne so kerɛ; ao Nyameɛ, fɛ ɛyaa, ná bɔ maen maen nemɔ!

⁸ Wɔ yeɛ anwu aworabɔlɛ worawora bɔ medi ɔ, fa wɔ towaa ne sɔ me nye moen. Aso ɔnne wɔ ngrataa nu anaa?

⁹ Na afei kyẽa bɔ ngosu ngɔfrɛ wɔ ne, me pɔfoɛ mɔ bɛkɔtete bekosa. Mese ye sɔ, ofikyɛ Nyameɛ gyi me si.

¹⁰ Nyameɛ bɔ meye ye dwirɛ ne ayɛ ne, AWURADE bɔ meye ye dwirɛ ne ayɛ ne,

¹¹ Nyameɛ yeɛ mefa me wora mewura ye nu ɔ, yiti menzuro hwee; nzikyɛ yeɛ kuro sona kɔhora kɔfa kɔyɔ me ɔ?

¹² Ao Nyameɛ, odi kyɛ metua m’aboadeɛ mema wɔ. Ngɔbɔ asennaa afɔleɛ ngɔma wɔ.

¹³ Ofikyɛ apepɛ ale me kra afi ewue nu, yeɛ amma manzoti mamvi ase, amaa ɔnate so manate Nyameɛ nyunu, wɔ ngoa kanea ne anu.