Edwein 54 - AHYERƐLƐ KRONGRON

AWURADE, bɔ me nwo waen

Dawide dwein. Ɔfa mane edweinhyirelɛniɛ ne mmerɛ bɔ Sifefoɛ bɛɛbɔle Sɔɔlo amaneɛ kyɛ Dawide waafea bɛ berɛ ne

¹ Ao Nyameɛ, fa wɔ dumaa pepɛ de me, ná fa wɔ tumi di me dwirɛ ma me.

² Ao Nyameɛ, tie me mbaeɛ; yɛ asoɛ tie me noa dwirɛ.

³ Ofikyɛ ɛwɔfoɛ mɔ badwɔso batia me, atianuserɛfoɛ bɛpena me beku me; bɛmva Nyameɛ bɛnyɛ huu. Sela

⁴ Nakoso Nyameɛ yeɛ ɔte me bokafoɛ ɔ; AWURADE yeɛ me kra wura ye sa ɔ.

⁵ Ɔkɔfa me pɔfoɛ mɔ bɛ bɔbɔ bɛ bɔne kotua bɛ so kerɛ. Wɔ nahorɛlilɛ ti, nua bɛ boso.

⁶ Ngɔbɔ akyɛdeɛ afɔleɛ ngɔma wɔ. Ao AWURADE, ngɔfa asennaa ngɔma wɔ dumaa, ofikyɛ ɔte paa.

⁷ Ofikyɛ wapepɛ wale me wafi amaneɛ amukoraa nu, na mafa me nye manwu me pɔfoɛ mɔ bɛ ngoguo.