Edwein 53 - AHYERƐLƐ KRONGRON

Dawide dwein. Ɔfa mane edweinhyirelɛniɛ ne

¹ Kwaseaa kã ye wɔ ye ti anu kyɛ, “Nyameɛ biala nne berɛ.” Belle adwene paa, na amumuyɛɛ bɔ ɔte akyiwadeɛ yeɛ bɛyɔ ɔ, ebiala nne berɛ bɔ ɔyɔ bɔ ɔte paa ɔ.

² Nyameɛ to ye nye fi nyameɛso ɔnea kuro mmenia, kyɛ aso okonwu ebie bɔ ɔse nworɛ, bɔ ɔpena Nyameɛ si atee ɔ.

³ Bɛ mukoraa bali makyebu, bɛ mukoraa adwene paa ɔnne bɛ ti anu, bɛ nu biala nne berɛ bɔ ɔyɔ bɔ ɔte paa ɔ; daabi, ko po nne berɛ.

⁴ Aso nimdeɛ abɔ amumuyɛɛfoɛ anaa? Bɛ yeɛ bedi me maen aminɛ kyɛ bedi aleɛ ne ala, ná bɛmbena Nyameɛ si atee ɔ.

⁵ Berɛ yeɛ esuronyi kandinga kɔtɔ bɛ so ɔ, esuronyi bɔ ebie ɔhhane bɛ le ɔ. Ofikyɛ bɛ bɔ bɛko betia wɔ ne, Nyameɛ kɔto bɛ mmowue kɔpete, ɛkɔma bɛ nyunu kogua ase, ofikyɛ Nyameɛ aye ye sa wafi bɛ bo.

⁶ Ao, ahaa né Yisrael ngoalelɛ wafi Sion wawa! Na sɛ Nyameɛ ma ye maen bɛ sa kã b’agyapadeɛ bieku a, Yakob koli ahurusi, na Yisrael nye kɔgye.