Edwein 52 - AHYERƐLƐ KRONGRON

Ngɔngɔnzaaniɛ ayieleɛ

Dawide dwein. Ɔhyerɛle ye mmerɛ bɔ Edomniɛ Dɔɔgye ɔɔbɔle Sɔɔlo amaneɛ kyɛ Dawide ahɔ Ahimɛlɛke berɛ ne

¹ Wɔ, anwoserɛniɛ, nzu ati yeɛ ɛfa bɔne bɔ edi ɔ hoahoa wɔ nwo ye? Nyameɛ nahorɛ wɔ berɛ daa.

² Wɔ noa kekã musue dwirɛ, wɔ temverema te kyɛ dɛmaa nnaennaen.

³ Wɔ nye gye bɔne nwo tra paa, yeɛ ekuro anoanupɛlɛ tra nahorɛhanɛ. Sela

⁴ Wɔ, nnakannaka sona, wɔ nye gye edwirɛ amukoraa bɔ ɔsɛkye sona dumaa nwo.

⁵ Nakoso Nyameɛ kobubu wɔ kogua berɛ afebɔɔ; ɔkɔpra wɔ boso kɔhwe wɔ kofi wɔ tena sua nu; okotu wɔ bo kofi teasefoɛ aseɛ so. Sela

⁶ Teneneefoɛ konwu ye kɔma bɛ nwo kodwiri bɛ, bɛkɔsere bɔnefoɛ ná bahã kyɛ,

⁷ “Ɛ́mɔnea sona bɔ wamva Nyameɛ wanyɛ ye afealeɛ, na mmom ɔfale ye wora wurale ye anwonya worawora nu, ná ɔfale ye nwo tole ye agyapadeɛ so ne!”

⁸ Nakoso me de, nde kyɛ olive bakaa monɛ wɔ Nyameɛ awuro; me wora wura Nyameɛ ɔdɔ bɔ onni ngasi ne anu afebɔɔ.

⁹ Ɔnate bɔ ayɔ ne ati, ngɔla wɔ ase daa. Ngɔfa me wora ngowura wɔ dumaa nu wɔ w’anwoteefoɛ mɔ nyunu, ofikyɛ ɔte paa.