Edwein 50 - AHYERƐLƐ KRONGRON

Nyameɛ solɛ paa

Asafe dwein

¹ Tuminiɛ ne, Nyameɛ bɔ ɔte AWURADE ne, wadwudwo, wato ye sa wafrɛ aseɛ ye aso ama amukoraa, fi eyia afiteleɛ kɔka eyia atɔleɛ.

² Sion bɔ ye anwonyemene di mu ne, Nyameɛ ta hyireinn fi berɛ.

³ Yɛ Nyameɛ ɔba, na ɔngɔyɛ konn, see bɔ ogye wuronyiwuronyi li ye nyunu, na mvrama piri apɛ ye nwo amukoraa wayia.

⁴ Ɔfrɛ nyameɛso bɔ ɔwɔ anwuro, ɔne aseɛ, kyɛ bɛɛnea kyɛ obua ye maen ndɛen ɔ.

⁵ Ɔnwa, “M’anwoteefoɛ bɔ bɛnate afɔleɛ so bɛ ne me ayɛ apam ne, ɛ́mɔboaboa bɛ noa bɛma me!”

⁶ Ewienu bɔ ye tenenee nwo dawure, ofikyɛ Nyameɛ bɔbɔ te ndɛenbualɛniɛ. Sela

⁷ “Ao me maen, tie na mebaadwudwo. Ao Yisrael, ngɔbɔ wɔ kwaadu. Me ole Nyameɛ, wɔ Nyameɛ.

⁸ Nna wɔ ngaka afɔleɛ ne ati yeɛ mekã wɔ nyunu ɔ; wɔ naen yeralɛ afɔleɛ ne, ɔwɔ me nyunu daa.

⁹ W’awuro nandwie nyii, yeɛ wɔ tuin nu mbɔngye ne, menhia.

¹⁰ Ofikyɛ eburo kaka biala te me deɛ, yeɛ mmokaa apee apee so nandwie nemɔ, bɛte me deɛ.

¹¹ Mese ewienu nnomaa mukoraa, na eburo kaka biala koso te me deɛ.

¹² “Sɛ ɛhɔen ku me a, ahaa nna ɛmɔ yeɛ ngosu hɔen ngohyire ɛmɔ ɔ, ofikyɛ wiase ne bɔ ɔwɔ nu amukoraa te me deɛ.

¹³ Aso nandwie naen yeɛ medi ɔ, anaa mbɔngye mogya yeɛ meno ɔ?

¹⁴ Fa asennaa yɛ afɔleɛ bɔ ma AWURADE, ná tua w’aboadeɛ ma Anwuro Anwuroniɛ ne.

¹⁵ Sũ frɛ me wɔ w’amaneɛnwunɛ mmerɛ nu, na ngɔpepɛ ngole wɔ, amaa ɔnate so ahyɛ me animnyam.”

¹⁶ Nakoso bɔnefoɛ de, Nyameɛ kã kyire ye kyɛ, “Atee beni yeɛ ele ye kyɛ ɛfa wɔ noa kekã m’ahyɛdeɛ, anaa ɛfa wɔ noa bɔ m’apam so ɔ.

¹⁷ Ofikyɛ ekyi kyɛ ngɔtea wɔ ɔ, yeɛ afa me dwirɛ ato ahameɛ.

¹⁸ Sɛ enwu awueniɛ a, ɛne ye betira abiɛngoɛ, na ɛne agyaasɛkyelɛfoɛ yeɛ betu nu ɔ.

¹⁹ Ɔnyɛ wɔ se kyɛ ɛte wɔ noa kekã musue dwirɛ ɔ, na nnakannaka wɔ wɔ noa nu.

²⁰ Ɛtena ase ɛkekã eliɛma nwo dwirɛ; na eni awa po, ɛpepɛ ye gya ndii nu.

²¹ Ɛyɔle sɔ nningyein nemɔ bɔ mandɛ wɔ so ne ati, ɛdwene kyɛ nde kyɛ wɔ ala. Na afei de, mekã wɔ nyunu ná mebɔ wɔ kwaadu.

²² “Ɛmɔ bɔ ɛmɔ wora ofi Nyameɛ ne, ɛ́mɔdwene ɛhe anwo, ná mandete ɛmɔ nu pasapasa bɔ ɛmɔngonya defoɛ ɔ.

²³ Sona bɔ ɔfa asennaa ɔbɔ afɔleɛ ma me ne, ɔhyɛ me animnyam; sona bɔ ye atee tengyɛ ne, ngɔmaa okonwu Nyameɛ ngoalelɛ ne.”