Edwein 5 - AHYERƐLƐ KRONGRON

AWURADE bɔ me nwo waen

Dawide dwein. Ɔfa mane edweinhyirelɛniɛ ne.

¹ Ao AWURADE, tie me noa dwirɛ, ná yɛ asoɛ tie adwenedwene bɔ watɔ me so ɔ.

² Tie me sufrɛ, me Hene ne me Nyameɛ, ofikyɛ wɔ yeɛ mebɔ mbaeɛ mekyire wɔ ɔ.

³ Ao AWURADE, ngyerɛmɔ ɛte me komvi, ngyerɛmɔ mefa me dwirɛ meto wɔ nyunu, na menwondɛ wɔ mmuayɛɛ.

⁴ Ofikyɛ ɛte Nyameɛ bɔ wɔ nye ngye bɔne nwo ɔ; bɔne ngora ne wɔ bɛndena.

⁵ Nduhoɛniɛ ɔngora ngyina wɔ nyunu; na ekyi bɔnefoɛ amukoraa.

⁶ Ɛma ngondombofoɛ b’ayieleɛ yie bɛ, na kodiawufoɛ ne ndurumfoɛ de, AWURADE kyi bɛ.

⁷ Nakoso, ɔnate wɔ ɔdɔ bɔ onni ngasi ne ati, ngɔwa w’awuro; ɔnate kyɛ mesuro wɔ ne ati, ngɔfa me nye ngohyire w’asɔneyɛɛ sua krongron ne ngɔsɔne wɔ.

⁸ Ao AWURADE, ɔnate me pɔfoɛ mɔ ati, fa wɔ tenenee ne kyire me atee; ma w’atee ne ɔla me nyunu turoloo.

⁹ Ofikyɛ bɛnga nahorɛ kaala, aborɛ yeɛ ɔwɔ bɛ ti anu ɔ; bɛ komvi te asieleɛ kumaa bɔ ɔla berɛ too ɔ, na bɛfa bɛ noa bɛdɛfɛdɛfɛ mmenia.

¹⁰ Ao Nyameɛ, ma bɛ bɔne ɔbɔ bɛ ti so, na bɛ bɔbɔ bɛ ngaen bɔ basua ne, maa ɔhye bɛ. Bɛ mmeraatolɛ worawora ne ati, foa bɛ fi wɔ nyunu, ofikyɛ bayɛ wɔ nwo lɔen.

¹¹ Nakoso ebiala bɔ ɔbafea wɔ nu ne de, ma ye nye gye; maa bɛfa anigye bɛto dwein daa. Bɔ bɛ nwo waen, amaa ɔnate so bɛ bɔ bɛ nye gye wɔ dumaa nwo ne, banya wɔ nu anigye.

¹² Ofikyɛ AWURADE, eyira sona bɔ ɔtengyɛ ɔ, ɛfa adom ɛpɛ ye nwo yia kyɛ akokyɛm.