Edwein 49 - AHYERƐLƐ KRONGRON

Nnɛfa wɔ nwo to anwonyadeɛ so

Kora boso ama dwein. Ɔfa mane edweinhyirelɛniɛ ne

¹ Maen maen amukoraa, ɛ́mɔtie edwirɛ he, wiase mmenia amukoraa, ɛ́mɔyɛ asoɛ betie,

² kwahweabaa mɔ ne atitire, sikafoɛ ne ehiafoɛ amukoraa.

³ Me noa kɔhã nworɛ dwirɛ, na me ti anu nzusuleɛ te nimdeɛ.

⁴ Ngɔyɛ asoɛ konn ngotie anyandera, ngɔbɔ sangoo ngɔpena m’anyandera nwo ndeaseɛ.

⁵ Sɛ amaneɛ to me, yeɛ bɛ bɔ bɛtane me nye ne, sɛ b’amumuyɛɛ pɛ me nwo bra yia a, nzu ati yeɛ odi kyɛ mesuro ɔ?

⁶ Nzu ati yeɛ nzuro bɛ bɔ bɛfa bɛ nwo bɛto b’anwonyadeɛ so, bɔ bɛfa b’anwonya bɛhoahoa bɛ nwo ɔ?

⁷ Amba, ebiala ngɔhora ngɔpɔ ye nwo; yeɛ ɔngɔhora ngotua ye ngoa ti nyɔboɛ ngɔma Nyameɛ.

⁸ Ofikyɛ sona kra nyɔboɛ yɛ se paa, na esikaa biala ngɔso ye nwo kerɛ tua

⁹ bɔ ɔkɔma sona kɔtena ase afebɔɔ, bɔ ɔngɔhɔ ɛborɔ kumaa nu ɔ.

¹⁰ Ye nye tua kyɛ nworɛfoɛ bewu; yeɛ ngwaseafoɛ ne gyiminiwaafoɛ koso bewu, na bɛyakyi b’agyapadeɛ berɛ maa okodi mmeni foforɛ sa nu.

¹¹ Ɔwɔ nu kyɛ bɛfale bɛ dumaa bɛtole b’aseɛ so de, nakoso b’asieleɛ yeɛ ɔte b’awuro afebɔɔ ɔ, na ɔte bɛ daberɛ aworɛ ndoatoasoɛ amukoraa nu.

¹² Dasaniɛ ngɔhora ngɔtena ye anwonya nu afebɔɔ, owu kyɛ ngaka ne ala.

¹³ Bɛ bɔ bede bɛ nwo bedi ne, sɔ yeɛ b’ayieleɛ te ɔ, bɛ bɔ bɛfa bɛ nwo bɛto b’anwonya so ne, b’ayieleɛ ɛne. Sela

¹⁴ Bɛte kyɛ mmoaen, na bɛ mukoraa bewu. Ewue yeɛ odi bɛ nyunu fa bɛ kɔ ɔ; teneneefoɛ koli bɛ so tumi ngyerɛmɔ, na b’anwonyemene kɔsɛkye wɔ ewue kumaa nu; na ɛborɔ yeɛ ɔkɔyɛ b’awuro ɔ.

¹⁵ Nakoso Nyameɛ kɔpɔ me kra kofi ɛborɔ sa nu, ofikyɛ okole me. Sela

¹⁶ Sɛ ebie yɛ sikaniɛ, sɛ onya ye nwo tam a, nnɛmaa ɔyɛ wɔ anyeboro.

¹⁷ Ofikyɛ sɛ owu a, ɔngɔfa hwee ngɔhɔ, yeɛ ye sikaa ngoli ye si ngɔhɔ bie.

¹⁸ Mmerɛ bɔ ɔte ngoa nu ne, obuli ye nwo kyɛ wayie ye yé, ofikyɛ sɛ sona nya ye nwo a, mmenia kamvo ye.

¹⁹ Nakoso ye mbanyi mɔ bɔ bengonwu eyia ko le ne, ɔkɔɔtoa bɛ.

²⁰ Dasaniɛ ngɔhora ngɔtena ye anwonya nu afebɔɔ, owu kyɛ ngaka ne ala.