Edwein 48 - AHYERƐLƐ KRONGRON

Sion te Nyameɛ kuro

Kora boso ama dwein. Ɔfa mane edweinhyirelɛniɛ ne

¹ AWURADE te piri, na ɔfata ayɛyelɛ piri paa wɔ yɛ Nyameɛ kuro ne anu. Ye bokaa krongron ne,

² bɔ ogyi berɛ tendenn nyemenenyemene ne, ɔte aseɛ ye amukoraa anika; Sion bokaa, bɔ ɔwɔ sorɔ dɔ dedeede ne, ɔte Ɛhene piri ne, ye kuro.

³ Nyameɛ wɔ kuro berɛ anwoserɛ afealeɛ ne anu, na wahyire kyɛ ye yeɛ ɔbɔ kuro ne anwo waen ɔ amba.

⁴ Tie, ahemvo mɔ bɛboaboale bɛ noa, bɛhane bɛ nwo bɛbɔle nu bɛwale Sion so.

⁵ Bɛ nye bɔle kuro ne aso pɛ, bɛbɔle binim; bɛ kunu tele bɛ, na bɛnwatili.

⁶ Bɛ nwo wosowosole bɛ wɔ berɛ, na bɛfale yealɛ nu kyɛ brasua bɔ aworɛ ahã ye ɔ.

⁷ Ɛfale eyia afiteleɛ mvrama ebubuli Tasise ɛlɛen nemɔ.

⁸ Kyɛbɔ yate ne, sɔ ala yeɛ yanwu ye, wɔ Asafo AWURADE ye kuro, yɛ Nyameɛ ye kuro, kuro bɔ Nyameɛ wafa watimu berɛ afebɔɔ ne aso ɔ. Sela

⁹ Ao Nyameɛ, yɛdwenedwene wɔ ɔdɔ bɔ onni ngasi ne anwo, wɔ w’asɔneyɛɛ sua ne anu.

¹⁰ Ao Nyameɛ, kyɛbɔ wɔ dumaa te ne, sɔ ala yeɛ bɛye wayɛ kɔpem aseɛ ye noa dɔ paa ɔ. Tenenee ayi wɔ sa famaa ne anu tɛkyɛ.

¹¹ Ɔnate wɔ ndɛenbualɛ turoloo ti, odi kyɛ Sion bokaa nye gye, ná Yuda mma mmrasua bedi ahurusi.

¹² Ɛ́mɔnate behyini Sion nwo bɛbra beyia, ɛmɔha ye abandenden nemɔ;

¹³ ɛ́mɔgyene ɛmɔ nye bɛnea ye fasue nemɔ yé, ɛ́mɔneanea ye anwoserɛ afealeɛ nemɔ anu yé, amaa amɔahora bahã ye nwo dwirɛ bahyire aworɛ ndoatoasoɛ bɔ ɔkɔwa nziɛ ye ne,

¹⁴ kyɛ Nyameɛ he, ɔte yɛ Nyameɛ afebɔɔ. Ye yeɛ okohyire yɛ atee kɔpem kyɛ ewue kɔfa yɛ ɔ.