Edwein 46 - AHYERƐLƐ KRONGRON

Nyameɛ gyi yɛ si

Kora boso ama dwein. Ɔfa mane edweinhyirelɛniɛ ne

¹ Nyameɛ te yɛ nwo ɛwaenbɔlɛ ne y’anwoserɛ, bokafoɛ paa bɔ opingye yɛ wɔ amaneɛnwunɛ mmerɛ nu ɔ.

² Yiti sɛ aseɛ kakyi butu, ná mmokaa tutu kogua ɛpo buma nu,

³ ná ɛpo nu nzue yɛ wuruwuru obu fa so, ná sɛ ye asorɔkye ma mmokaa bɛwoso po a, ɛserɛ ngɔhã yɛ. Sela

⁴ Asue bie wɔ berɛ bɔ ye sa mɔ fa anigye bɛba Nyameɛ kuro ɔ, Anwuro Anwuroniɛ ne, ye atenaleɛ krongron berɛ.

⁵ Nyameɛ wɔ kuro ne afia, yiti bɛngɔhora so ngonim di; Nyameɛ kofi ngyerɛmɔ tutuutu kɔboka ye ndɛndɛ.

⁶ Amaen maen mɔ bɛteatea nu, ahennie mɔ batete bapanzam; ɔbobɔ nu kurudududu, na aseɛ woso.

⁷ Asafo AWURADE gyi yɛ si; Yakob Nyameɛ te y’anwoserɛ afealeɛ. Sela

⁸ Ɛmɔbra bɛɛnea AWURADE sa noa nnwumaa, kyɛbɔ wasi wayɔ anwanwadeɛ mbiri mbiri wɔ aseɛ ye aso ɔ.

⁹ Ɔmaa koɛ bo ɔpɛ alaa kɔka aseɛ noa dɔ; obubu agyaen nu, na obubu pealɛɛ nu gɔsɔgɔsɔ, na ɔfa see yera teaseɛnam mɔ.

¹⁰ “Ɛ́mɔyɛ konn, ná ɛ́mɔnwu kyɛ me ole Nyameɛ! Medi hene wɔ maen maen mɔ so, medi aseɛ ye aso hene.”

¹¹ Asafo AWURADE gyi yɛ si; Yakob Nyameɛ te y’anwoserɛ afealeɛ. Sela