Edwein 43 - AHYERƐLƐ KRONGRON

De me fi amaneɛ nu

¹ Ao Nyameɛ, bua me be, ná di me dwirɛ ma me fi amumuyɛɛ maen sa nu; pepɛ de me fi nnakannakafoɛ ne ndɛengyeafoɛ bɛ sa nu!

² Ofikyɛ wɔ yeɛ ɛte Nyameɛ bɔ menwati mebafea wɔ nu ɔ; na nzu ati yeɛ apo me e? Nzu ati yeɛ ɔnate ɛhyɛlɛ bɔ pɔfoɛ ne ɔhyɛ me so ti, odi kyɛ menate berɛ anwumvoin anwumvoin ɔ?

³ Ao, soma wɔ kanea ne, ɔne wɔ nahorɛ ne maa beli me nyunu; maa bɛfa me bɛbra wɔ bokaa krongron ne aso, ɔne w’atenaleɛ berɛ.

⁴ Na ngɔhɔ Nyameɛ afɔleɛ bokyea ne anwo, ngɔhɔ Nyameɛ bɔ ɔte m’anigye mmorosoɛ ne berɛ; ao Nyameɛ, me Nyameɛ, ngɔbɔ sangoo ngɔye wɔ ayɛ.

⁵ Ao me kra, nzu ati yeɛ aboto sɔaa ye, nzu ati yeɛ wɔ wora abɔ wɔ me nu e? Fa wɔ wora wura Nyameɛ nu, ofikyɛ ngosa ngɔye ye ayɛ. Ɔte me bokafoɛ ne me Nyameɛ.