Edwein 41 - AHYERƐLƐ KRONGRON

Anwonyerɛsalɛ nwo mbaeɛ

Dawide dwein. Ɔfa mane edweinhyirelɛniɛ ne

¹ Sona bɔ ɔdwene anwumvoinniɛ nwo ne, onya saleɛ. AWURADE pepɛ de ye wɔ ye amaneɛnwunɛ mmerɛ nu.

² AWURADE bɔ ye nwo waen, na ɔmaa onya ngoa, oyira ye wɔ aseɛ so. Bɔ ye pɔfoɛ mɔ bɛpena kyɛ ɔto ye ne, ɛmma ɔndo ye.

³ Anwonyerɛ kã ye to mba so a, AWURADE nea ye; sɛ anwonyerɛ bɔ ye a, ɛma ye nwo sande ye.

⁴ Ngane kyɛ, “Ao AWURADE, nwu me anwumvoin; sa me anwonyerɛ, ofikyɛ mayɔ bɔne matia wɔ.”

⁵ Me pɔfoɛ mɔ bele adwene tɛɛ bɛkekã me nwo dwirɛ kyɛ, “Kyinzu yeɛ okowu ma ye dumaa boso konunu ɔ?”

⁶ Sɛ ebie bapasa me nwo a, edwirɛ bɔ ɔkã ne, nna ye ahone nu yeɛ ofi ɔ, nzɛmmɔne yeɛ osusu ye nwo wɔ ye ti anu ɔ; na sɛ ofi me nwo berɛ kɔ a, ɔfa kotene.

⁷ Me pɔfoɛ mɔ amukoraa, bɛbɔ nu bedi me nwo nzekure, ɔhale bɛ ngome a, ahaa edwirɛ tɛɛ ato me.

⁸ Bɛkekã kyɛ, “Anwonyerɛ bɔ wabɔ ye ne ɔte piri, ongodwɔso ngofi ye bɛen so ko.”

⁹ Mmiɛngo bɔ mede ye medi paa, bɔ yeɛ me ne ye yɛto asaa yɛdidi ne, ye yeɛ waye me wama ɔ.

¹⁰ Nakoso, ao AWURADE, nwu me anwumvoin, maa nde apɔ, ná ngora ndua bɛ so kerɛ!

¹¹ Amma me pɔfoɛ wanni me so ngonim; na ɛhe amaa manwu kyɛ ekuro me dwirɛ.

¹² Ɔnate me nahorɛlilɛ ti, atira me nu, na afa me atena wɔ nyunu afebɔɔ.

¹³ AWURADE Yisrael Nyameɛ ne, animnyam hã ye ofi tete bɔ ɔkwaadwu afebɔɔ! Amen ne Amen.