Edwein 38 - AHYERƐLƐ KRONGRON

Nnuhoɛ mbaeɛ

Dawide dwein: bɛto ye ngayeɛ afɔleɛ mmerɛ

¹ Ao AWURADE, nnɛtwi me nyunu wɔ wɔ yaafɛlɛ nu, yeɛ nnɛtwe me so wɔ w’ahonehulɛ nu.

² Ofikyɛ w’agyaen nemɔ basinasina me, na w’asohwenɛ awa me so.

³ Ɔnate wɔ yaa bɔ afɛ ne ati, me nwo ndɔ me wɔ me wereɛ nu; ɔnate me bɔne ti, me mmowue nu we me.

⁴ Ofikyɛ m’amumuyɛɛ abungam afa me so; na nu nonɛ obu me kɔme anu.

⁵ Me nwo ngena batu, na bɛbo, ɔnate me ngwaseasɛm bɔ mali ne ati.

⁶ Me nu akondo, nna ayanga pakayaa, na daa biala medi aworabɔlɛ.

⁷ Me nwo yerayera me wuronyiwuronyi, me nwo ndɔ me wɔ me wereɛ nu.

⁸ Me nwo ayɛ me bɛtɛɛ, yeɛ mayɛ hodwoo; mepene, ɔnate aworabɔlɛ bɔ medi ne ati.

⁹ Ao AWURADE, bɔ mepena amukoraa la wɔ nyunu, na me penelɛ ne ɔmvea wɔ.

¹⁰ M’ahone bɔ palipali, m’anwoserɛ so ate, na me nye so ayɛ me wusiwusi.

¹¹ M’adɔfo mɔ ne me mmango mɔ, baye bɛ nye wɔ amaneɛnwunɛ ne anwo, na m’abusuafoɛ mɔ bahwe bɛ nwo baagyina dedeede.

¹² Bɛ bɔ bɛpena me beku me ne, basunzua me ngaen; bɛ bɔ bɛpena me bepura me ne, m’asefinɛ nwo dwirɛ yeɛ bɛkã ɔ, na daa biala bɛbɔ me nwo porɛ.

¹³ Nakoso mayɛ kyɛ asotiniwaaniɛ bɔ ɔnde dwudwolɛ ɔ; mayɛ kyɛ emumu bɔ ɔngora dwudwo ɔ.

¹⁴ Amba, mayɛ kyɛ sona bɔ ɔnde dwudwolɛ ɔ, bɔ ɔngora nye edwirɛ noa ɔ.

¹⁵ Nakoso ao AWURADE, wɔ yeɛ me nye la wɔ so ɔ; ao AWURADE me Nyameɛ, wɔ yeɛ ekobua me ɔ.

¹⁶ Na me mbaeɛ ole kyɛ, “Bɛ bɔ mesoti a, né ɔyɛ bɛ fɛ ne, nnɛmaa bedi m’asefinɛ nwo ahurusi.”

¹⁷ Ofikyɛ mayie ase tɔ, na daa me nwo tutu me.

¹⁸ Mefa m’amumuyɛɛ meto dwaa, na medi yealɛ wɔ me bɔne nwo.

¹⁹ Bɛ bɔ bɛpɔ me mbaen ne, bɛ nye yɛ se paa; bɛ bɔ bekyi me kɔkɔkɔkɔ ne, bɛsone pee.

²⁰ Bɛ bɔ bɛfa bɔne betua me paa so kerɛ ne, bɛte me pɔfoɛ mɔ, ofikyɛ me de, meyɔ nikyee bɔ ɔte paa ɔ.

²¹ Ao AWURADE, nnɛpo me, ao me Nyameɛ, nnɛtwe wɔ nwo fi me nwo.

²² Yɛ ndɛ baaboka me, ao AWURADE, me ngoadefoɛ.