Edwein 37 - AHYERƐLƐ KRONGRON

Teneneefoɛ ne bɔnefoɛ akatuaa

Dawide dwein

¹ Nnɛma bɔnefoɛ bɛ nwo adwenedwene tɔ wɔ so, yeɛ nnɛma wɔ nye boro amumuyɛɛfoɛ,

² ofikyɛ ɔngɔhyɛ né bapɛ bɛ bagua kyɛ ɛserɛ, ná bakese kyɛ ndire.

³ De AWURADE di, na yɔ bɔ ɔte paa ɔ; amaa ɔnate so anya aseɛ ne aso atena, ná wɔ nwo atɔ wɔ.

⁴ Ma wɔ nye gye wɔ AWURADE nu, na ɔkɔma wɔ sa kɔhã bɔ w’ahone bu ɛpena ɔ.

⁵ Fa wɔ nwo ma AWURADE, fa wɔ wora wura ye nu, na okoli kɔma wɔ.

⁶ Na ɔkɔma wɔ tenenee kɔla ali kyɛ kanea, ná wɔ belilɛ ne wata kyɛ eyiagyina.

⁷ Yɛ konn wɔ AWURADE nyunu, ná to wɔ bo ase nwondɛ ye. Sona bɔ ɔnate ye bɔbɔ ye atee so onya ye nwo, yeɛ sona bɔ ɔdwene nikyee tɛɛ nwo, ná ɔyɔ ne, nnɛma ye nwo adwenedwene tɔ wɔ so.

⁸ Twe wɔ nwo fi ɛyaafɛlɛ nwo, yeɛ nnɛma w’ahone hu. Nnɛma adwenedwene tɔ wɔ so; ɔne bɔne ngome yeɛ bɛnate ɔ.

⁹ Ofikyɛ bekonua bɔnefoɛ bɛ boso, nakoso bɛ bɔ bɛ nye la AWURADE so ne de, bɛ sa kɔhã aseɛ ne.

¹⁰ Ɔngɔhyɛ biala, bɔnefoɛ bɛ boso konua; ɛmɔkɔyere bɛ nwo bɛkɔpena bɛ boso, nakoso ɛmɔngonwu bɛ.

¹¹ Nakoso anwobrɛaseɛfoɛ bɛ sa kɔhã aseɛ ne; ɔnate asomdwee kandinga ne ati, bɛ nye kɔgye.

¹² Bɔnefoɛ bɛbɔ teneneefoɛ mɔ nwo porɛ, na bɛnwose bɛ gye bekyire bɛ.

¹³ Nakoso bɔnefoɛ nwo yɛ AWURADE sere, ofikyɛ ɔse kyɛ ye kyẽa ne wapingye.

¹⁴ Bɔnefoɛ twe ye ngrandɛ, na osina ye agyaen mɔ kyɛ ɔfa kã ehiafoɛ ne bɛ bɔ bɛyɛ anwumvo ɔ ogua ase, ná okũkũ teneneefoɛ.

¹⁵ Ye ngrandɛ ne kɔwɔ ye bɔbɔ ye ahone nu, na ye agyaen nemɔ anu kobubu.

¹⁶ Nikyee kãa biala bɔ teneneeniɛ ole ye ne, odi mu tra bɔnefoɛ pee b’anwonya.

¹⁷ Ofikyɛ bɔnefoɛ b’abasa nu kobu, nakoso teneneefoɛ de, AWURADE tira bɛ nu.

¹⁸ Mmenia bɔ bɛ bra te sannwuu ne, bɛ ngyẽa la AWURADE nyunu; na b’agyapadeɛ kɔtena berɛ afebɔɔ.

¹⁹ Mmerɛ bɔ ɔtte mayee nu, bɛ nyunu ngogua ase, na ɛhɔen piri ba a, aleɛ kobu bɛ so.

²⁰ Nakoso bɔnefoɛ de, bɛ boso konua, na AWURADE pɔfoɛ mɔ, bɛte kyɛ ndire nyerɛen; bekotu bekomini, bekotu bekomini kyɛ nwosina.

²¹ Bɔnefoɛ bebisa bosea a, bendua, nakoso teneneefoɛ de, bɛse anwumvoin, na bɛyɛ ayɛ.

²² Ofikyɛ bɛ bɔ AWURADE ayira bɛ ne, bɛ yeɛ bɛ sa kɔhã aseɛ ne ɔ; nakoso bɛ bɔ wanoma bɛ ne de, bɛ boso konua.

²³ AWURADE yeɛ otutu sona gya siesie yé ɔ, sɛ ye atee sɔ ye nye a, ɔmaa otindim.

²⁴ Sɛ ɔtɔ ase po a, ɔngɔtɔ ase tim, ofikyɛ AWURADE tira ye sa.

²⁵ Mayɛ akwadaa le, na kekesaala ye de manyi, nakoso nnwuni ye le kyɛ Nyameɛ apo teneneeniɛ ɔ, anaakyɛ ye boso ama bɛsrɛsrɛ aleɛ ɔ.

²⁶ Onwu anwumvoin daa, na ofia ye kunu fa nikyee fɛmo, na ye boso ama benya saleɛ.

²⁷ Twe wɔ nwo fi bɔne nwo, ná yɔ bɔ ɔte paa ɔ; na ɛkɔtena berɛ afebɔɔ.

²⁸ Ofikyɛ AWURADE kuro ndɛenbualɛ turoloo, na ɔngɔpo ye anwoteefoɛ. Ɔkɔbɔ anwoteefoɛ nwo waen afebɔɔ, nakoso bɔnefoɛ boso ama de, bɛ boso konua.

²⁹ Teneneefoɛ bɛ sa kɔhã aseɛ ne, na bɛkɔtena so afebɔɔ.

³⁰ Teneneeniɛ kã nworɛ dwirɛ, na ye noa dwirɛ te nahorɛ turoloo.

³¹ Ye Nyameɛ mmeraa ne wɔ ye ahone nu; na onni ye nwo makyebu.

³² Bɔnefoɛ bɛtetɛ teneneefoɛ, kyɛ bɛpena bɛ beku bɛ.

³³ AWURADE ngɔyakyi teneneeniɛ ngowura bɔnefoɛ sa; yeɛ bedi teneneeniɛ dwirɛ a, ɔngɔma bengobua ye fɔ.

³⁴ Ma wɔ nye la AWURADE so, ná nate ye atee so, na ɔkɔpagya wɔ maa aseɛ ne kɔyɛ w’agyapadeɛ; na wɔ nye konwu kyɛbɔ bɔnefoɛ bɛ boso onua ɔ.

³⁵ Manwu bɔnefoɛ atianuserɛniɛ, bɔ wanyi tendenn kyɛ Lebanon sida ɔ.

³⁶ Nakoso tie, mbɛle nu berɛ nen, né ɔnne berɛ ko; mbenane ye, nakoso mannwu ye.

³⁷ Hyɛ sona bɔ ye bra te sannwuu ɔ nzorɛ, ná nea teneneeniɛ, ofikyɛ sɔ sona ne, ye ayieleɛ te asomdwee.

³⁸ Nakoso mmeraatolɛfoɛ de, bɛ mukoraa bekowuwu; bɔnefoɛ boso ama bɛ boso konua.

³⁹ Teneneefoɛ de, bɛ ngoalelɛ fi AWURADE, na bɛkɔ amaneɛ nu a, ye yeɛ ɔte b’afealeɛ ɔ.

⁴⁰ AWURADE boka bɛ, na ɔpepɛ de bɛ; ɔpepɛ de bɛ fi bɔnefoɛ sa nu, na ode bɛ ngoa, ofikyɛ bɛnwati bɛkɔfea ye nu.