Edwein 36 - AHYERƐLƐ KRONGRON

Nyameɛ te paa

Nyameɛ somvoɛ Dawide dwein. Ɔfa mane edweinhyirelɛniɛ ne

¹ Amumuyɛɛ dwudwo kyire bɔnefoɛ wɔ ye ti anu; bɔnefoɛ nye so de, Nyameɛ nwo nyɛ suro.

² Ofikyɛ ode ye nwo di alaa maa ɔnate so ɔngora nwu ye amumuyɛɛ, maa ɔnate so ɔngora ngyi ye amumuyɛɛ ne.

³ Ye noa nu dwirɛ te bɔne ne nnakannaka; na bra bɔ nworɛ wɔ nu ná ɔte paa de, wayakyi ye bɔlɛ.

⁴ Ɔla ye bɛen so a, nzɛmmɔne yeɛ osusu ye nwo ɔ; wape bɔne atee so, na ongyi bɔne.

⁵ Ao AWURADE, wɔ ɔdɔ bɔ onni ngasi ne, ɔkɔkã ewienu dɔ paa, yeɛ wɔ nahorɛlilɛ ne, okodwu munungum nemɔ anu.

⁶ Wɔ tenenee kɔ anwuro anwuro te kyɛ Nyameɛ mmokaa, na wɔ ndɛenbualɛ turoloo ne, ye kuronn te kyɛ ɛpo buma. Ao AWURADE, ɛpepɛ de kuro mmenia ne ngaka.

⁷ Ao Nyameɛ, wɔ ɔdɔ bɔ onni ngasi ne, kyɛbɔ ye nwo osi le mvasoɛ ɔ! Na adasa mmaa bɛnwati bɛbafea wɔ ndaa ne abo fɔnwoo ne anu.

⁸ Bedi aleɛ bɔ wabu so wɔ w’awuro ne ma bɛko yi, na ɛma bɛ nzue bɔ ofi w’anigye asue nu maa bɛno.

⁹ Ofikyɛ wɔ yeɛ ɛte ngoa asue ti ɔ, na wɔ kanea ne anu yeɛ yɛnwu kanea ɔ.

¹⁰ Ao, wɔ ɔdɔ bɔ onni ngasi ne, kɔ so ye kyire bɛ bɔ bɛse wɔ ɔ, na ye wɔ ngoalelɛ ne kyire bɛ bɔ bɛtengyɛ ɔ!

¹¹ Nnɛma anwomasoɛfoɛ betwi bɛfa me so, yeɛ nnɛma amumuyɛɛfoɛ betu me bo.

¹² Nea, kyɛbɔ bɔnefoɛ batotɔ ɔ, bafindifindi bɛ bagua ase, bɔ bɛngɔhora dwɔso ko ɔ.