Edwein 32 - AHYERƐLƐ KRONGRON

Bɔnefakyɛ nu anigye

Dawide dwein

¹ Sona bɔ Nyameɛ afa ye mmeraatolɛ wahyɛ ye, ná wakyikyi ye bɔne ne, onya saleɛ.

² Sona bɔ AWURADE mva ye amumuyɛɛ mmɔ ye kwaadu, bɔ nnakannaka suban biala nne ye nu ne, onya saleɛ.

³ Mmerɛ bɔ ngane me noa ndole nu ne, m’aporɛ so yɛle me hodwoo, ɔnate ɛpenenɛ bɔ né mepene daa biala ne ati.

⁴ Ofikyɛ wɔ sa gyi me nwo eyia ne kɔngɔen; m’anwoserɛ amukoraa yiele kyɛbɔ asue wewe wɔ wawa mmerɛ ɔ. Sela

⁵ Afei ngane me bɔne ngyirele wɔ, na mangata m’amumuyɛɛ so. Ngane kyɛ, “Ngɔhã me mmeraatolɛ ngohyire AWURADE,” na ɛfale me bɔne nwo foɛlilɛ hyɛle me. Sela

⁶ Yiti ebiala bɔ ɔtengyɛ ne, odi kyɛ ɔbɔ mbaeɛ okyire wɔ. Amaneɛnwunɛ mmerɛ nu, sɛ amaneɛnwunɛ ba ye so kyɛ asue bɔ wayi bɔ ɔse wuruwuru a, ye de ɔngoto ye.

⁷ Wɔ yeɛ ɛte m’afealeɛ ɔ, wɔ yeɛ ɛbɔ me nwo waen fi amaneɛ nu ɔ; ɛfa wɔ ngoalelɛ dwein ɛpɛ me nwo yia. Sela

⁸ (AWURADE nwa nyoo): Ngohyirehyire wɔ ná mahyire wɔ atee bɔ ɛfa so ɔ; me nye wɔ wɔ so, na ngotu wɔ foɛ.

⁹ Nnɛma ɛmɔyɛ kyɛ pɔngɔ anaa afunum bɔ olle nimdeɛ, bɔ odi kyɛ ɛfa nyamaa ne buralɛ ewura ye noa nu koraka né watena wɔ nwo ɔ.

¹⁰ Amaneɛ pee yeɛ ɔtoto bɔnefoɛ ɔ, nakoso sona bɔ ɔfa ye nwo to AWURADE so ne de, AWURADE ɔdɔ bɔ onni ngasi ne, ɔpɛ ye nwo bra yia.

¹¹ Ao teneneeniɛ, di ahurusi wɔ AWURADE nu, ná ma wɔ nye gye, na ɛmɔ bɔ ɛmɔ ahone nu te ne amukoraa, ɛmɔli ahurusi bɛbɔ ese.