Edwein 31 - AHYERƐLƐ KRONGRON

AWURADE, bɔ me nwo waen

Dawide dwein. Ɔfa mane edweinhyirelɛniɛ ne

¹ Ao AWURADE, wɔ nu yeɛ menwati mebafea ɔ, nnɛma me nyunu gua ase le; wɔ tenenee ti, pepɛ de me.

² Yɛ asoɛ tie me, pepɛ de me ndɛndɛ. Mepena kyɛ ɛyɛ me nyɔbotaen bɔ menwati mebafea nu ɔ, anwoserɛ afealeɛ bɔ ɔpepɛ de me ɔ.

³ Amba, wɔ yeɛ ɛte me nyɔbotaen ne m’anwoserɛ afealeɛ ɔ; wɔ dumaa ti, di me nyunu ná kyire me atee ne.

⁴ Ye me fi ngaen bɔ basua bafea me ne anu, ofikyɛ wɔ yeɛ ɛte m’anwoserɛ ɔ.

⁵ Wɔ sa nu yeɛ mefa me sunzum mewura ɔ; ao AWURADE, nahorɛniɛ Nyameɛ, apepɛ ale me.

⁶ Mekyi bɛ bɔ bɛso mmosoen bɔ bɛ nwo olle mvasoɛ biala ɔ, nakoso me de, me wora wura AWURADE nu.

⁷ Me nye kɔgye ná mali ahurusi, ɔnate wɔ ɔdɔ bɔ onni ngasi ne ati, ofikyɛ anwu m’amaneɛnwunɛ ne, na wɔ nye tua aworabɔlɛ bɔ me kra odi ɔ.

⁸ Amva me anwura pɔfoɛ ne sa; afa me agyina nekaa bɔ berɛ baye ɔ.

⁹ Ao AWURADE, nwu me anwumvoin, ofikyɛ edwirɛ ato me; Aworabɔlɛ ama me nye ayɛ wusiwusi, na aworabɔlɛ amaa me kra ne me nipadua baboto.

¹⁰ Aworabɔlɛ piapia me kɔ ewue nu, na m’afoɛ amukoraa wayɛ ɛpenenɛ ngome. M’amumuyɛɛ ama m’anwoserɛ so ate, na m’aporɛ nu ayɛ me hodwoo.

¹¹ Mayɛ sona bɔ me pɔfoɛ mɔ amukoraa bɛgoro me nwo ɔ, na mayɛ nikyee suronyisuronyi wɔ me mmango mɔ nu. Me manifoɛ mɔ besuro me; mmenia nwu me wɔ dwaaso a né bɛnwati.

¹² Mmenia wora afi me kyɛ sona bɔ wawu ɔ; mayɛ kyɛ nyangaa bue.

¹³ Ofikyɛ mate nwuhunwuhu bɔ mmenia bɛyɔ ne, anwunanwuna apɛ me nwo wayia: bɔ bɛbɔ me ti so porɛ, ná bɛpena me beku me ɔ.

¹⁴ Nakoso ao AWURADE, mafa me wora mawura wɔ nu, menwa, “Me Nyameɛ ole wɔ.”

¹⁵ Wɔ sa nu yeɛ me hyɛberɛ wura ɔ; me pɔfoɛ mɔ ne bɛ bɔ bɛtane me nye ne, pepɛ de me fi bɛ sa nu.

¹⁶ Ma wɔ nyunu ɔta hyireinn ma wɔ somvoɛ! Gyina wɔ ɔdɔ bɔ onni ngasi ne aso pepɛ de me.

¹⁷ Ao AWURADE, nnɛma me nyunu gua ase, ofikyɛ mesu mefrɛ wɔ. Ma amumuyɛɛfoɛ bɛ nyunu ogua ase, ma bɛ noa omua maa bɛfa bɛhɔ ɛborɔ.

¹⁸ Ma ngondombofoɛ bɛtɔ mumu, bɛ bɔ bɛfa anwomasoɛ ne dwɛɛ bɛkekã edwirɛ tɛɛ betia teneneefoɛ ne.

¹⁹ Ao, wɔ lolɛ bɔ ahyehyɛ ato berɛ ama bɛ bɔ besuro wɔ ne, ɔyɛ nwanwa soma! Bɛ bɔ bɛnwati bɛbafea wɔ nu ne, ye yeɛ ɛfa bɔ bɛ nwo waen bɔ adasa bɛ nye tua ɔ!

²⁰ Wɔ natelɛ bɔ ɛne bɛ nate ne, ɔbɔ bɛ nwo waen fi mmenia bɛ porɛ bɔ babɔ ɔ nwo; ɛfa wɔ ndaa butu bɛ so ede bɛ fi ngɔngɔnzaafoɛ sa nu.

²¹ Animnyam hã AWURADE, ofikyɛ waye ye ɔdɔ bɔ onni ngasi ne ali wahyire me, mmerɛ bɔ me nwo hyerele me kyɛ kuro bɔ batua ye ɔ ne.

²² Me kunu tele me ne, ngane kyɛ, “Afoa me afi wɔ nyunu ahɔ dedeede.” Nakoso nzu mvrɛle wɔ ne, etiele me sufrɛ.

²³ Ɛmɔ, anwoteefoɛ amukoraa, ɛmɔhuro AWURADE dwirɛ. AWURADE bɔ anwoteefoɛ nwo waen, nakoso ebiala bɔ ɔma ye nwo so ne, otua ye so kerɛ piri paa.

²⁴ Ɛ́mɔgyina pindinn, ná ɛ́mɔma ɛmɔ hue yɛ se, ɛmɔ amukoraa bɔ ɛmɔ nye la AWURADE so ɔ.