Edwein 27 - AHYERƐLƐ KRONGRON

AWURADE te me kanea ne me ngoalelɛ

Dawide dwein

¹ AWURADE te me kanea ne me ngoalelɛ, nwa yeɛ mesuro ye ɔ? AWURADE te me ngoa ye anwoserɛ afealeɛ, nwa nwo suronyi yeɛ ɔkɔtɔ me so ɔ?

² Sɛ nzɛmmɔnefoɛ ba me so kyɛ bɛbaatete me nu pasapasa a, sɛ me pɔfoɛ mɔ bɛba me so a, bekosoti bekofifi ase.

³ Sɛ ɛlɔen kyekye asikyeleɛ kyɛ bɛbaafa koɛ bɛtoa me po a, me kunu ngɔtete me; sɛ bɛfa koɛ bɛbateta me po a, ngogyina pindinn.

⁴ Nikyee komapɛ yeɛ masrɛ AWURADE ɔ, sɔ nikyee ne yeɛ mepena ye si atee ɔ: ye ole kyɛ ngɔtena AWURADE awuro mmerɛ bɔ nde ase amukoraa, ná manea AWURADE animnyam, ɔne kyɛ me ne ye yɛkoli ngitahoɛ wɔ ye asɔneyɛɛ sua nu ɔ.

⁵ Ofikyɛ ɔfa me sie ye afealeɛ ne anu wɔ amaneɛnwunɛ mmerɛ nu; ɔfa me fea ye tena sua afealeɛ ne anu, na ɔfa me gyina nyɔbotaen so.

⁶ Afei ɔmaa medi ngonim wɔ me pɔfoɛ mɔ bɔ bapɛ me nwo bayia ɔ so, ná ngɔfa esebɔlɛ ngɔbɔ afɔleɛ wɔ ye tena sua ne anu. Ngɔto anigye dwein ngɔye AWURADE ayɛ.

⁷ Ao AWURADE, sɛ mesu mefrɛ wɔ a, tie me, nwu me anwumvoin, ná tie me sufrɛ!

⁸ Ahã ahyire me kyɛ, “Pena me si atee!” Na mmuale kyɛ, “AWURADE, wɔ si atee yeɛ mepena ɔ.”

⁹ Nnɛye wɔ nye fea me, nnɛfɛ yaa foa w’akoaa, na wɔ yeɛ ɛte me bokafoɛ ɔ. Nnɛpo me, yeɛ nnɛyakyi me nu, ao Nyameɛ, me ngoadefoɛ!

¹⁰ Sɛ me baba ne me maame bɛpo me po a, AWURADE de, okole me.

¹¹ Ao AWURADE, kyire me w’atee ne, ná fa me fa atimbire frɛtɛɛ so, ɔnate me pɔfoɛ mɔ ati.

¹² Nnɛmaa mekɔtɔ me pɔfoɛ mɔ ngaen nu, ofikyɛ adanzefoɛ ngondombofoɛ badwɔso batia me, na bɛpepɛ edwirɛ mbiri mbiri begua me so.

¹³ Mede medi kyɛ ngonwu AWURADE paayɛlɛ ne wɔ ateasefoɛ aseɛ ye aso.

¹⁴ Ma wɔ nye ɔla AWURADE so, gyina pindinn ná ma wɔ hue yɛ se; nahorɛ nu, ma wɔ nye ɔla AWURADE so!