Edwein 25 - AHYERƐLƐ KRONGRONAWURADE, kyire me atee Dawide dwein 1 Ao AWURADE, wɔ yeɛ mefa me kra mewura wɔ sa nu ɔ. 2 Ao me Nyameɛ, wɔ yeɛ me wora wura wɔ nu ɔ; nnɛma me nyunu gua ase; nnɛma me pɔfoɛ mɔ bedi m’asefinɛ nwo ahurusi. 3 Nahorɛ nu, bɛ bɔ bɛ nye la wɔ so ne, nnɛma bɛ nyunu gua ase; bɛ bɔ bɛnate ngondombo atee so bɛye bɛ biɛngo bɛma ne, ma bɛ nyunu gua ase. 4 Ao AWURADE, maa nwu w’atee ne; fa me fa wɔ saa bɔ apɛ ato berɛ ne aso. 5 Di me nyunu maa nnate wɔ nahorɛ ne anu, ná kyirekyire me, ofikyɛ wɔ yeɛ ɛte me ngoadefoɛ Nyameɛ ɔ; wɔ yeɛ me nye la wɔ so daa biala ɔ. 6 Ao AWURADE, kaye w’anwumvoinnwunɛ ɔne wɔ ɔdɔ bɔ onni ngasi ne, ofikyɛ bɛwɔ berɛ fi tete. 7 Ao AWURADE, ɔnate wɔ paayɛlɛ ne ati, nnɛkaye me ngwadaa nu bɔne, ɔne me mmeraatolɛ; gyina wɔ ɔdɔ bɔ onni ngasi ne aso ná kaye me! 8 AWURADE te paa, na ɔtengyɛ; yiti okyire bɔnefoɛ atee maa bɛfa so. 9 Odi anwobrɛaseɛfoɛ nyunu maa bɛfa tenenee nu, na okyirekyire anwobrɛaseɛfoɛ maa bɛfa ye atee so. 10 AWURADE atee amukoraa te ɔdɔ bɔ onni ngasi ne nahorɛ ma bɛ bɔ bedi ye apam ne ye dwirɛ so ɔ. 11 Ao AWURADE, wɔ dumaa ti, fa me bɔne kyɛ me, ofikyɛ ɔte piri. 12 Nwa yeɛ ɔte sona bɔ osuro AWURADE ɔ? Ye yeɛ AWURADE kohyire ye atee bɔ odi kyɛ ɔfa so ɔ. 13 Ye kra kɔtena asomdwee nu, na ye boso ama konya aseɛ ne maa ɔkɔyɛ b’agyapadeɛ. 14 AWURADE ne bɛ bɔ besuro ye ne yeɛ betu asure ɔ, na ɔye ye apam ne ali kyire bɛ. 15 Me nye la AWURADE so afebɔɔ, ofikyɛ ɔkɔye me gya kofi ngaen nu. 16 Pɛne wɔ nye baanea me, ná nwu me anwumvoin, ofikyɛ waha me ngome, na menwu amaneɛ. 17 Adwenedwene bɔ ɔla me so ne te piri, ao, ye me fi m’amaneɛnwunɛ nu. 18 Nea yealɛ ne amaneɛ bɔ menwu ye ɔ, ná fa me bɔne amukoraa kyɛ me. 19 Nea me pɔfoɛ mɔ bɛ somaa, ná nea ɛpɔen kandinga bɔ bɛpɔ me ɔ. 20 Ao, bɔ me kra nwo waen ná pepɛ de me; nnɛma me nyunu gua ase, ofikyɛ wɔ yeɛ menwati mebafea wɔ nu ɔ. 21 Ma pɛpɛɛpɛyɛlɛ ne nahorɛlilɛ ɔnea me so, ofikyɛ wɔ yeɛ mafa me nwo mato wɔ so ɔ. 22 Ao Nyameɛ, pepɛ de Yisrael fi ye amaneɛ amukoraati nu. |
Esahie Bible © Bible Society of Ghana, 2018.
Bible Society of Ghana