Edwein 24 - AHYERƐLƐ KRONGRON

AWURADE awuro berɛ hɔlɛ

Dawide dwein

¹ Aseɛ ye, ɔne so nningyein amukoraa bɛte AWURADE deɛ; ewiase ne bɔ ɔwɔ nu amukoraa bɛte ye deɛ,

² ofikyɛ ye yeɛ wagyina ye wɔ ɛpo so, ná wafa ye watimu asue mɔ so ɔ.

³ Nwa yeɛ ɔkɔfo AWURADE bokaa ne ɔ? Nwa yeɛ okogyina ye nekaa krongron berɛ ɔ?

⁴ Sana sona bɔ ye bra te sannwuu, ná ye ahone nu koso te, bɔ ye kra nye ngye ngondombo nwo, ná ɔnda ngondombo ndaen ɔ.

⁵ Ye yeɛ okonya AWURADE sa nu saleɛ ɔ, na Nyameɛ bɔ ɔte ye ngoadefoɛ ne, okobua ye be.

⁶ Bɛ bɔ bɛpena AWURADE si atee ne, ao Yakob Nyameɛ, bɛ bɔ bɛsɔne wɔ ne, sɔ yeɛ bɛte ɔ.

⁷ Ao pambim mɔ, ɛ́mɔma ɛmɔ nwo so! Ɛmɔ, tete anoa mɔ, ɛ́mɔpagya ɛmɔ nwo, ná animnyam Hene ne oowura nu.

⁸ Nwa yeɛ ɔte animnyam Hene ne ɔ? AWURADE ɔ, anwoserɛniɛ ne tuminiɛ ne, AWURADE bɔ ɔte koɛ nu katakyie ne.

⁹ Ao pambim mɔ, ɛ́mɔma ɛmɔ nwo so! Ɛmɔ, tete anoa mɔ, ɛ́mɔpagya ɛmɔ nwo, ná animnyam Hene ne oowura nu.

¹⁰ Nwa yeɛ ɔte sɔ animnyam Hene ne ɔ? Asafo AWURADE ɔ, ye yeɛ ɔte animnyam Hene ne ɔ. Sela