Edwein 21 - AHYERƐLƐ KRONGRON

Ngonimlilɛ nwo asennaa

Dawide dwein. Ɔfa mane edweinhyirelɛniɛ ne

¹ Ao AWURADE, w’anwoserɛ ne ati ɛhene ne nye gye; na wɔ ngoalelɛ ne ati, nea kyɛbɔ osi di ahurusi paa ɔ!

² Ama ye sa ahã bɔ ye ahone nu ɔpena ɔ, na bɔ wate ye noa wabisa ne, amva ammɔ ye atianuserɛ.

³ Ofikyɛ ɛfa saleɛ kandinga yia ye, na ɛfa esikaa kɔkorɛ paa abotire bɔ ye.

⁴ Ɔsrɛle wɔ berɛ ngoa, na ɛfa mane ye; ɛmane ye ngoa tendenn afebɔɔ.

⁵ Wɔ ngoalelɛ ti, ye animnyam te piri; na afa anidie ne ahennie alo ye.

⁶ Amba, ɛmaa onya saleɛ piri afebɔɔ, na anika bɔ onya ye wɔ wɔ nyunu ne ati, ɛma ye nye gye.

⁷ Ofikyɛ ɛhene ne wafa ye nwo wato AWURADE so, na Anwuro Anwuro Nyameɛ, ye ɔdɔ bɔ onni ngasi ne ati, ongofĩ ase.

⁸ Wɔ sa kɔhã wɔ pɔfoɛ mɔ amukoraa. Na bɛ bɔ bekyi wɔ ne, wɔ sa famaa kɔhyehye bɛ mukoraa.

⁹ Sɛ ɛye wɔ nwo ali a, ɛkɔmaa bɛkɔyɛ kyɛ foonoo nu see. AWURADE kohũhũ bɛ wɔ ye yaafɛlɛ ne anu, na see kɔyera bɛ.

¹⁰ Ekonua bɛ mma boso kofi aseɛ ye aso, ɔne bɛ boso ama kofi adasa mmaa nu.

¹¹ Sɛ bɛbɔ wɔ nwo porɛ, yeɛ sɛ bɛfa wɔ nwo adwene tɛɛ a, ɔngɔyɛ yé.

¹² Ofikyɛ ɛkɔfoa bɛ maa bɛkɔnwati; ɛkɔfa w’agyaen ne kohyire bɛ so.

¹³ Ao AWURADE, gyina w’anwoserɛ so ma wɔ nwo so! Yɛkɔto dwein yɛkɔye wɔ tumi ne ayɛ.