Edwein 20 - AHYERƐLƐ KRONGRON

Ngonimlilɛ nwo mbaeɛ

Dawide dwein. Ɔfa mane edweinhyirelɛniɛ ne

¹ Mesrɛ kyɛ AWURADE otie wɔ sufrɛ wɔ amaneɛnwunɛ mmerɛ nu! Yakob Nyameɛ ne, ye dumaa ɔ́bɔ wɔ nwo waen!

² Ɔ́soma mmokalɛ ofi ye nekaa krongron berɛ ɔɔboka wɔ, ná ófi Sion bokaa so oogyina wɔ si.

³ AWURADE ɔ́kaye w’afɔleɛ amukoraa, ná ɔ́ma ye nye sɔ wɔ naen yeralɛ afɔleɛ. Sela

⁴ Ɔ́ma wɔ sa hã bɔ w’ahone nu ɛpena ɔ, ná ɔ́ma wɔ nzusuleɛ amukoraa ɔ́yɛ berɛ.

⁵ Maa yɛfa ahurusililɛ yɛbɔ wɔ ngoalelɛ nwo ese, ná yɛpagya yɛ frangaa wɔ yɛ Nyameɛ dumaa nu. AWURADE ɔ́yɔ w’abisadeɛ amukoraa ɔ́ma wɔ.

⁶ Afei, manwu kyɛ AWURADE boka ye sona bɔ wapopa ye ngoo ne; otie ye sufrɛ wɔ ye nyameɛso krongron dɔ, na AWURADE ye anwoserɛ asaa famaa ne ɔpepɛ de ye.

⁷ Ebiemɔ fa bɛ wora bewura teaseɛnam mɔ nu, yeɛ ebiemɔ koso bɛfa bɛ deɛ bewura mbɔngɔ nu; nakoso yɛ de, yɛ wora wura AWURADE yɛ Nyameɛ dumaa nu.

⁸ Bɛ de, besoti befifi ase, nakoso yɛ de, yɛdwɔso yɛgyina berɛ kyirebeinn.

⁹ Ao, AWURADE, pepɛ de ɛhene ne, na sɛ yɛsu yɛfrɛ wɔ a, tie yɛ.