Edwein 18 - AHYERƐLƐ KRONGRON

Ngonimlilɛ dwein

Dawide dwein, mmerɛ bɔ AWURADE pepɛ lele ye fili ye pɔfoɛ amukoraa ne Sɔɔlo sa nu ne

¹ Ao AWURADE bɔ ɛte m’anwoserɛ ɔ, mekuro wɔ dwirɛ.

² AWURADE te me nyɔbotaen, m’anwoserɛ afealeɛ ne me defoɛ, me Nyameɛ, me nyɔbotaen bɔ mebɔ me nwo waen wɔ wɔ nu ɔ, me buralɛ ataadeɛ ne me ngoalelɛ anwoserɛ ɔne m’anwoserɛ afealeɛ.

³ AWURADE bɔ ɔfata ayɛyelɛ ne, ye yeɛ mesu mefrɛ ye ɔ, na ɔpepɛ de me fi me pɔfoɛ mɔ sa nu.

⁴ Ewue nyamaa brabrale me, na ewue bu fale me so kyɛ asue;

⁵ ɛborɔ dɔ nyamaa mendale me, na ewue ngaen wale me so kyɛ ɔbaahye me.

⁶ Nzu mvrɛle AWURADE wɔ m’amaneɛ nu, na ndeane nu mvrɛle me Nyameɛ kyɛ ɔboka me. Ɔwɔ ye asɔneyɛɛ sua nu dɔ yeɛ ɔtele me komvi ɔ, na me sufrɛ dwuli ye so anu.

⁷ Yeɛ aseɛ pusuli, na ɔwosole; mmokaa mɔ nyinasoɛ ye bo kekane, na ɔwosole, ɔnate kyɛ ye ahone huli.

⁸ Nwosina fili ye bonyi anu pu wale; see wuronyiwuronyi fili ye noa nu wale, na see bɔ wasɔ gonn fili ye nwo tutu guale.

⁹ Ɔmoamoane ewienu, na odwuli ase, na né awosii kabii wɔ ye gya bo.

¹⁰ Ɔtenane kɛrubo so tuli, na ɔnate mvrama ye ndaa so wale ndɛndɛ.

¹¹ Ɔfale awosii munduni ye nwo, ɔfale munungum kusuu, bɔ ɔte esue bɔ wamuna ɔ katale ye nwo.

¹² Kanea hyireinn bɔ oli ye nyunu ne, asukɔtwea kungumaboɔ ne see gonn fili nu bɔ wurale ye munungum ne anu.

¹³ AWURADE bɔle nu kurudududu wɔ nyameɛso, na Anwuro Anwuro Nyameɛ ne dwudwole nen, asukɔtwea kungumaboɔ ne see gonn tete guale.

¹⁴ Ɔtotole agyaen mane ye pɔfoɛ mɔ bɔle aya, ye agralaa bɔ ɔtetele ne mane bɛ nye so tanene.

¹⁵ Afei ɛpo ye bo dɔ aseɛ yele ye nwo ali, na aseɛ nyinasoɛ nwo lale berɛ, ofikyɛ, ao AWURADE, ɛhane bɛ nyunu, yeɛ nwomeɛ koso fili wɔ bonyi anu tu wale ne ati ɔ.

¹⁶ Ɔtengyɛle ye sa fili anwuro ɔɔsɔle me nu, na ɔyele me fili buma nu.

¹⁷ Olele me fili me pɔfoɛ anwoserɛniɛ sa nu, ɔne bɛ bɔ bekyi me ɔ, bɛ sa nu; ofikyɛ né bɛ nwo yɛ se tra me koraa.

¹⁸ M’amaneɛnwunɛ mmerɛ nu yeɛ bɛwale me so ɔ, nakoso AWURADE gyinane me si.

¹⁹ Ɔyele me fili amaneɛ nu mane me nwo tɔle me, ɔpepɛ lele me, ofikyɛ okuro me dwirɛ.

²⁰ AWURADE neane kyɛbɔ mesi metengyɛ ɔ so mane me ye nwo akatuaa; ogyinane kyɛbɔ me bra si te sannwuu ɔ so mane me ye nwo akatuaa.

²¹ Ofikyɛ mali AWURADE dwirɛ so, na nnyɔle bɔne nngakyili me si mmmane Nyameɛ.

²² Mali ye nhyehyɛleɛ amukoraa so, yeɛ ye ahyɛdeɛ koso, nndwene me nwo mmvili ye nwo.

²³ M’atee tengyɛ wɔ ye nyunu, na mate me nwo mafi bɔne nwo.

²⁴ Ye sɔ ne ati, AWURADE agyina me tengyɛlɛ so wama me ye nwo akatuaa; wagyina kyɛbɔ me bra te sannwuu wɔ ye nyunu ɔ so.

²⁵ Sona bɔ odi nahorɛ ma wɔ ne, wɔ wora edi nahorɛ ma ye, yeɛ sona bɔ mvomsoɛ nne ye nwo ne, wɔ wora ɛmaa onwu kyɛ mvomsoɛ nne wɔ nwo.

²⁶ Bɔ ye nwo te ne, wɔ wora ɛmaa onwu kyɛ wɔ nwo te, nakoso sona bɔ ɔte kanda de, ɛmaa onwu kyɛ ɛse nworɛ tra ye.

²⁷ Ɛpepɛ de anwobrɛaseɛfoɛ, nakoso anwomasoɛfoɛ de, ɛbrɛ bɛ ase.

²⁸ Wɔ yeɛ ɛsɔ me kanea ɔ, AWURADE me Nyameɛ ɔta ma m’awosii yɛ hyereinn.

²⁹ Egyina me si maa medi ɛlɔen so ngonim, me Nyameɛ gyina me si maa mehuru mefa fasue so.

³⁰ Sɔ Nyameɛ he, ye atee tengyɛ, AWURADE bɔhyɛ te nahorɛ, na ebiala bɔ ɔbɔ ye nwo waen wɔ Nyameɛ nu ne, Nyameɛ te ye buralɛ ataadeɛ.

³¹ Nwa yeɛ ɔte Nyameɛ ɔ? Sana AWURADE angome. Nwa yeɛ ɔte nyɔbotaen ɔ? Sana yɛ Nyameɛ angome.

³² Sɔ Nyameɛ he bɔ ɔma me anwoserɛ ne, ɔma me brabɔlɛ tengyɛ.

³³ Ɔma me gya boso yɛ nyera kyɛ kɛtɛbɔɔ, na ɔmaa megyina pindinn wɔ mmokaa so.

³⁴ Okyire me koɛhonɛ, amaa ɔnate so mekora mekondo kɔɔbere agyaen nu.

³⁵ Afa wɔ ngoalelɛ akokyɛm ne ama me, na wɔ mmokalɛ amaa mayɛ sona titire.

³⁶ Ɛbɔ atee pralaa maa mefa so bɔ ɔmaa menzoti ɔ.

³⁷ Mvoane me pɔfoɛ mɔ, na ngɔndole bɛ, na manza me si kɔpem kyɛ ngukuni bɛ ɔ.

³⁸ Mmobɔle bɛ nguale berɛ bɔ bangora dwɔso ko ɔ, na bɛtotɔle beguale me gya bo.

³⁹ Ɛmane me koɛ nu anwoserɛ, na ɛmane me pɔfoɛ mɔ lili ngoguo wɔ me nyunu.

⁴⁰ Ɛmane me pɔfoɛ mɔ nwati fili me nyunu, bɛ bɔ bekyi me ne, nnuane bɛ boso.

⁴¹ Bɛteateane nu bɛpenane mmokalɛ, nakoso bannya defoɛ biala, besu bɛfrɛle AWURADE, nakoso wandɛ bɛ so.

⁴² Ndini bɛ muhumuhu kyɛ mvuture bɔ mvrama hu ye kɔ ɔ, na mvindini bɛ nguale kyɛ dwaaso nnɛterɛ.

⁴³ Mmenia bɔ bɛyɔle me nwo lɔen ne, ɛpepɛ lele me fili bɛ sa nu. Ɛfale me tuale maen maen mɔ noa, na mmenia bɔ né menze bɛ ɔ bɛsole me.

⁴⁴ Bɛtele me nga pɛ yeɛ bɛyɛle sotie bɛmane me ɔ. Maen maen so ama wale bɛɛkotole me.

⁴⁵ Ahunundetelɛ tɔle maen maen so ama so, na bɛfale anwopopolɛ befili b’anwoserɛ afealeɛ mɔ nu befite bɛwale.

⁴⁶ AWURADE te ase! Me nyɔbotaen, meye wɔ ayɛ! Me ngoadefoɛ Nyameɛ, mekamvo wɔ!

⁴⁷ Nyameɛ bɔ ɔtɔ me pɔfoɛ so wereɛ ma me ɔ, ye bɔ ɔbrɛ maen maen mɔ ase wura me bo ɔ,

⁴⁸ ye bɔ ode me fi me pɔfoɛ mɔ sa nu ɔ; amba, bɛ bɔ bedwɔso betia me ne, wɔ yeɛ ɛma me so maa bewura me bo ɔ, na ede me fi mmenia bɔ awosii wɔ bɛ ti anu ɔ bɛ sa nu.

⁴⁹ Yiti, O AWURADE, ngɔkamvo wɔ wɔ maen maen mɔ so, ná mabɔ wɔ dumaa mato ayɛyelɛ dwein.

⁵⁰ Odi ngonim piri paa ma ye hene ne, ɔye ɔdɔ bɔ onni ngasi ɔ ali kyire sona bɔ wapopa ye ngoo ne, ɔye ye ali kyire Dawide ne ye boso ama afebɔɔ.