Edwein 17 - AHYERƐLƐ KRONGRON

Pepɛ de me fi ndaneanyeɛfoɛ sa nu

Dawide mbaeɛ

¹ Ao AWURADE, tie me dwirɛ bɔ ɔyɛ fɛ, yeɛ tie me sufrɛ; tie me mbaeɛ bɔ ofi noa bɔ nnakannaka ɔnne nu ɔ nu.

² Nea ná bua me be, ma wɔ nye nwu edwirɛ bɔ ɔtengyɛ ɔ.

³ Sɛ ɛneanea m’ahone nu, ná ɛpɛnzɛpɛnzɛ me ti anu dwirɛ nu kɔngɔen, ná eso me nea a, engonwu bɔne biala wɔ me nu; mayɛ m’adwene kyɛ mengɔfa me noa mengɔhã edwirɛ bɔ ɔte bɔne ɔ.

⁴ Mmenia bɛ yɔleɛ ne, ngyi wɔ noa dwirɛ so mahwe me nwo mafi basabasayɔlɛfoɛ bɛ yɔleɛ nwo.

⁵ W’atee ne ala yeɛ nnate so ɔ, yeɛ me gya koso ossotili offili so.

⁶ Ao, Nyameɛ, mesu mefrɛ wɔ, ofikyɛ ekotie me; yɛ asoɛ tie me, tie me dwirɛ.

⁷ Wɔ ɔdɔ bɔ onni ngasi ne, ye ye ali kyire me wɔ atee bɔ ɔyɛ nwanwa ɔ so; bɛ bɔ bɛnwati befi bɛ pɔfoɛ mɔ sa nu bɛbafea wɔ berɛ ne, wɔ yeɛ ɛfa wɔ sa famaa ɛpepɛ ede bɛ ɔ.

⁸ Bɔ me nwo waen kyɛ sona nye kyiremvua; fa me fea wɔ ndaa ne abo fɔnwoo ne anu.

⁹ Bɔnefoɛ bɔ badwɔso me so ne, pepɛ de me fi bɛ sa nu, pɔfoɛ awudifoɛ bɔ bapɛ me nwo bayia nemɔ, pepɛ de me fi bɛ sa nu.

¹⁰ Bennwu sona anwumvoin koraa, na bɛfa bɛ noa bɛkekã anwomasoɛ dwirɛ.

¹¹ Bahã me bamia, na bapɛ me nwo bayia; bafa basie bɛ nye so kyɛ bɛkɔhã me bɛkɔto ase.

¹² Bɛte kyɛ gyata bɔ ɔpena kaka bie kye ye ɔ; bɛte kyɛ gyata akrɔngrɔma bɔ wafea ɔtetɛ ɔ.

¹³ Ao, AWURADE, dwɔso fa koɛ toa bɛ, ná di bɛ so ngonim! Fa wɔ ngrandɛ ne pepɛ de me ngoa fi bɔnefoɛ sa nu.

¹⁴ Ao AWURADE, fa wɔ tumi ne pepɛ de me fi adasa mmaa sa nu; adasa mmaa bɔ b’akatuaa wɔ wiase wa ala ne, de me fi bɛ sa nu. Akatuaa bɔ ahyehyɛ ato berɛ ama bɛ ne, fa tua bɛ so kerɛ piri paa; ma bɛ mma mɔ benya akatuaa ne mmorosoɛ, ná bɛ́fa bie bɛ́yakyi bɛ nnomaa mɔ.

¹⁵ Na me de, ɔnate kyɛ metengyɛ ne ati, ngonwu wɔ nyunu; sɛ medafe metingye a, m’ahone kɔtɔ me kunu, kyɛ manwu wɔ nyunu ɔ.