Edwein 15 - AHYERƐLƐ KRONGRON

Sona bɔ ɔkɔtena Nyameɛ nekaa krongron berɛ ɔ

Dawide dwein

¹ Ao AWURADE, nwa yeɛ okosikye wɔ tena sua ne anu ɔ? Nwa yeɛ ɔkɔtena wɔ bokaa krongron ne aso ɔ?

² Sana bɔ ye bra te sannwuu, bɔ ɔyɔ bɔ ɔtengyɛ, bɔ ofi ye ahone nu ɔkã nahorɛ,

³ bɔ ɔmva ye noa ngeka mmenia nwo dwirɛ tɛɛ, bɔ ɔnyɔ obiɛngo bɔne, ná ommu obiɛngo animtia ɔ.

⁴ Sɔ sona ne, amumuyɛɛfoɛ bɛla ye nye so mbaen, na ɔfa anidie ma bɛ bɔ besuro AWURADE ɔ. Sɛ ɔta ndaen ma ye nwo kyere ye po a, ommu so;

⁵ ɔmmɔ bosea mva nzihoɛ nzi ye nwo, yeɛ onne fea-ase-ma mmua bɔ odi be ɔ ndɛengyea. Ebiala bɔ odi sɔ dwirɛ nemɔ aso ne, ye bo ngotutu.