Edwein 149 - AHYERƐLƐ KRONGRON

Ayɛyelɛ dwein

¹ Ɛ́mɔye AWURADE ayɛ! Ɛ́mɔto dwein foforɛ bɛ́ye AWURADE ayɛ, ye nwo ayɛyelɛ dwein wɔ anwoteefoɛ badwa nu.

² Odi kyɛ Yisrael nye gye, ɔnate (Nyameɛ) bɔ yeɛ ɔbɔle ye ne ati, odi kyɛ Sion mma bɛ nye gye, ɔnate bɛ Hene ne ati.

³ Odi kyɛ bɛfa abilie bɛye ye dumaa ayɛ, odi kyɛ bɛfa akasaa ne adengum bɛto ye nwo dwein.

⁴ Ofikyɛ AWURADE nye gye ye maen nwo, na ɔfa ngoalelɛ ɔbɔ anwobrɛaseɛfoɛ abotire.

⁵ Odi kyɛ anwoteefoɛ bedi ahurusi wɔ animnyam nu; odi kyɛ bɛfa anigye bɛto dwein wɔ bɛ bɛen so.

⁶ Odi kyɛ bɛfa bɛ noa bɛbɔ Nyameɛ nzabranoa, ná bétira sɛpɔ wɔ bɛ sa nu,

⁷ bɔ bɛkɔfa bɛkɔtɔ amaen maen mɔ so wereɛ, bɔ bɛkɔfa bɛkɔhwe amaen maen mɔ bɛ so,

⁸ ná bafa buralɛ bakyekye b’ahemvo mɔ, ná bafa ngɔnzɔngɔnzɔ bagua b’atitire mɔ,

⁹ ná bafa ndɛenbualɛ bɔ bahyerɛ bato berɛ ne babua bɛ ndɛen. Ɛhe te animnyam ma AWURADE anwoteefoɛ amukoraa. Ɛ́mɔye AWURADE ayɛ!