Edwein 147 - AHYERƐLƐ KRONGRON

Nyameɛ tumi nwo ayɛyelɛ

¹ Ɛ́mɔye AWURADE ayɛ! Ofikyɛ ɔte paa kyɛ ɛkɔto yɛ Nyameɛ nwo ayɛyelɛ dwein ɔ; ɔse anwumvoin, na ayɛyelɛ dwein fata ye.

² AWURADE yeɛ ɔkyekye Yerusalem ɔ, na Yisraelfoɛ bɔ bahye bɛ nnure bahɔ ne, ɔboaboa bɛ noa.

³ Ɔkyekye bɛ bɔ bɛ wora abɔ ɔ wora, na ɔteta bɛ ngena nu.

⁴ Ye yeɛ ɔse nzramaa mɔ bɛ somaa ɔ, na ɔtoto bɛ mukoraa bɛ dumaa.

⁵ Y’AWURADE te piri, na ye tumi te piri, ye nimdeɛ ne, sona nze ye ti ne ye bo.

⁶ AWURADE ma anwobrɛaseɛfoɛ so, nakoso bɔnefoɛ de, ofindi ye to ase.

⁷ Ɛ́mɔto AWURADE nwo asennaa dwein; ɛ́mɔbɔ sangoo beli yɛ Nyameɛ nwo ahurusi!

⁸ Ye yeɛ ɔfa munungum kata ewienu ɔ, ɔboaboa esue noa maa ɔtɔ gua aseɛ so, na ɔma ndire fifi mmokaa so.

⁹ Ɔma eburo ngaka aleɛ, bɛ ne adene mma bɔ besu nemɔ.

¹⁰ Nna pɔngɔ anwoserɛ yeɛ ye nye gye ye nwo ɔ, yeɛ nna sona amirika yeɛ ɔsɔ ye nye ɔ;

¹¹ na mmom AWURADE nye gye bɛ bɔ besuro ye ɔ nwo, bɛ bɔ bɛfa bɛ nwo bɛto ye ɔdɔ bɔ onni ngasi ne aso ne.

¹² Ao Yerusalem, ye AWURADE ayɛ; Ao Sion, ye wɔ Nyameɛ ayɛ!

¹³ Ofikyɛ wamiamia wɔ pambim si mmuralɛ nemɔ anu, wayira wɔ mma bɔ bɛwɔ wɔ nu ne.

¹⁴ Ɔma asomdwee ba w’aseɛ so, na ɔma wɔ atokoɔ paa ma wɔ ko yi.

¹⁵ Ɔsoma ye mmeraa dwirɛ maa ɔba aseɛ so, na ye dwirɛ ne tu amirika ndɛndɛ.

¹⁶ Ɔtɔ asukɔtwea kyɛ gyese, ɔpete ɛborɔ kyɛ nzoen.

¹⁷ Ɔto ye asukɔtwea gua kyɛ nyɔboseka. Ye ɛyerɛ ne, nwa yeɛ ɔkɔhora ye noa gyina ɔ?

¹⁸ Ɔsomane ye noa dwirɛ, na ɔmaa behurole, ɔma ye mvrama bɔ, na nzue tengyɛ.

¹⁹ Ɔlale ye dwirɛ ali hyirele Yakob, ɔfale ye ahyɛdeɛ ne ye nhyehyɛleɛ mane Yisrael.

²⁰ Wanyɔ sɔ wamma maen foforɛ, bɛnze ye nhyehyɛleɛ. Ɛ́mɔye AWURADE ayɛ!