Edwein 146 - AHYERƐLƐ KRONGRON

Bokafoɛ Nyameɛ nwo ayɛyelɛ

¹ Ɛ́mɔye AWURADE ayɛ! Ao me kra, ye AWURADE ayɛ!

² Mmerɛ bɔ nde ngoa nu amukoraa, ngɔye AWURADE ayɛ; ngɔto Nyameɛ nwo ayɛyelɛ dwein mmerɛ bɔ nwomeɛ wɔ me nu ye.

³ Nnɛma ɛmɔfa ɛmɔ wora bewura ahemvo mɔ nu, yeɛ nnɛma ɛmɔfa wora bewura adasa mmaa bɔ mmokalɛ biala mvi bɛ berɛ mma ɔ, bɛ nu.

⁴ Sɛ sona nwomeɛ fi ye nu a, sona sa kɔ ye nnɛterɛ nu; sɔ kyẽa ne ala, ye nhyehyɛleɛ ye bo pɛ.

⁵ Sona bɔ ye bokafoɛ ole Yakob Nyameɛ, bɔ ye wora wura AWURADE ye Nyameɛ nu ne, onya saleɛ.

⁶ Nyameɛ bɔ odi ye dwirɛ so afebɔɔ ne, ye yeɛ ɔbɔle anwuro ne aseɛ, ɛpo ne nu nningyein amukoraa ɔ.

⁷ Sona bɔ besisi ye ne, ye yeɛ odi ye dwirɛ ma ye ɔ, na ye yeɛ ɔma bɔ ɛhɔen ku ye ɔ aleɛ ɔ. AWURADE ma kukunufoɛ benya fawɔnwodi.

⁸ AWURADE te anyesiniwaafoɛ bɛ nye, AWURADE ma bɛ bɔ baboto ɔ so, AWURADE kuro teneneefoɛ bɛ dwirɛ.

⁹ AWURADE yeɛ ɔbɔ ɛwɔfoɛ mɔ nwo waen ɔ; ɔnea nyisiaafoɛ ne akunafoɛ, nakoso bɔnefoɛ atee de, ɔmaa ɔyɛ basaa.

¹⁰ AWURADE koli hene afebɔɔ, ao Sion, wɔ Nyameɛ di hene aworɛ ndoatoasoɛ amukoraa nu. Ɛ́mɔye AWURADE ayɛ!