Edwein 144 - AHYERƐLƐ KRONGRON

AWURADE, pepɛ de yɛ maen ne

¹ Animnyam hã AWURADE me Nyɔbotaen ne bɔ okyire me koɛhonɛ, ɔne me sa mmaa kyɛbɔ besi bɛko ɔ.

² Me nyɔbotaen ne m’afealeɛ, m’anwoserɛ afealeɛ ne me defoɛ, m’akokyɛm bɔ mebɔ me nwo adwaa wɔ nu ɔ, bɔ ɔfa maen maen mɔ wura me bo ɔ.

³ Ao AWURADE, dasaniɛ te nzu koraa bɔ wɔ nye ku ye nwo ye, yeɛ kuro sona te nzu bɔ ɛdwene ye nwo ye?

⁴ Sona te kyɛ nwomeɛ; ye ngyẽa te kyɛ wawoɛ bɔ ɔpɛ nu kɔ ɔ.

⁵ Ao AWURADE, wɔ ewienu ne, bobɔ ná dwu bra ase; fa wɔ sa kã mmokaa maa betu nwosina.

⁶ Tete agralaa yerɛmyerɛm, ná bɔ bɛ pete; soma w’agyaen nemɔ maa behũhũ bɛ pasaa.

⁷ Tengyɛ wɔ sa fi anwuro dɔ; maa nya me ti nnidi nu, ná pepɛ de me fi asue mbiri nu, fi amanvrafoɛ bɛ sa nu.

⁸ Bɛfa bɛ noa bɛkekã edwirɛ mbaen mbaen, na bɛ sa famaa ne te ngondombo asaa.

⁹ Ao Nyameɛ, ngɔto edwein foforɛ ngɔye wɔ ayɛ; sangoo bɔ ye nyamaa buru yeɛ ngɔbɔ ngɔye wɔ ayɛ ɔ.

¹⁰ Wɔ yeɛ ɛma ahemvo bedi ngonim ɔ; wɔ yeɛ ɛpepɛ de wɔ somvoɛ Dawide fi ngrandɛ bɔ odi awue noa ɔ.

¹¹ Pepɛ de me, ná de me fi ɛwɔfoɛ mma mɔ sa nu, bɛ yeɛ bɛ noa kekã edwirɛ mbaen mbaen, ná bɛ sa famaa te ngondombo asaa ɔ.

¹² Ahaa né yɛ mma mmienzua mɔ bɛ mmerandeɛ nu wayɛ kyɛ mmakaa bɔ bahye ɔ, ná yɛ mma mmrasua mɔ koso bayɛ kyɛ ndweasoɛ bonima, bɔ bapakye ye kyɛ bɛfa besi ahemvie ɔ.

¹³ Ahaa né yɛ pata mɔ so ayi to bɔ aleɛ ahoroɔ gua so ɔ; ahaa né yɛ mmoaen bawo apee apee, apee buru apee buru wɔ yɛ aseɛ mɔ aso.

¹⁴ Ahaa né yɛ nandwie mɔ banwonzɛnwonzɛ bɔ bɛngɔpɔ baa anaa bengoli abawuo ɔ. Nnɛmaa yɛte aworabɔlɛ esuɛ wɔ yɛ dwaa mɔ so.

¹⁵ Maen bɔ sɔ nningyein nemɔ wɔ so ne, benya saleɛ, maen bɔ AWURADE te bɛ Nyameɛ ne, benya saleɛ!