Edwein 143 - AHYERƐLƐ KRONGRON

AWURADE, pepɛ de me

Dawide dwein

¹ Ao AWURADE, tie me mbaeɛ; yɛ asoɛ tie me sufrɛ; wɔ nahorɛlilɛ ɔne wɔ tenenee ti, tie m’abisadeɛ.

² W’akoaa, nnɛfa me wura ndɛenbualɛ nu, ofikyɛ teasefoɛ biala nni be wɔ wɔ nyunu.

³ Ofikyɛ pɔfoɛ ne atu ye nye wasie me kra so, wabɔ me ngoa wato ase, na wamaa matena awosii nu kyɛ bɛ bɔ bawuwu dada ɔ.

⁴ Yiti me sunzum aboto wɔ me nu; m’ahone bɔ ɔla me kunu ɔ, ye wora abɔ.

⁵ Mekaye daa tete ne, medwenedwene wɔ nnwumaa amukoraa nwo. Mekayekaye wɔ sa noa nnwumaa.

⁶ Metrɛ me sa nu mekyire wɔ; wɔ nwo nzuhɔen ku me kra kyɛ aseɛ bɔ wayɛ wosee ɔ. Sela

⁷ Ao AWURADE, yɛ ndɛ bua me; me sunzum wora abɔ. Nnɛye wɔ nye fea me; ɔba ye sɔ a, ngɔyɛ kyɛ bɛ bɔ bawu bahɔ ɛborɔ kumaa nu ne.

⁸ Maa nde wɔ ɔdɔ bɔ onni ngasi ne nga ngyerɛmɔ, ofikyɛ wɔ yeɛ mefa me wora mewura wɔ nu ɔ. Maa nwu atee bɔ mva so ɔ; ofikyɛ wɔ yeɛ mepagya me kra mekyire wɔ ɔ.

⁹ Ao AWURADE, pepɛ de me fi me pɔfoɛ mɔ sa nu; wɔ berɛ yeɛ menwati mebabɔ me nwo adwaa ɔ.

¹⁰ Kyirekyire me maa nyɔ w’apɛdeɛ, ofikyɛ wɔ yeɛ ɛte me Nyameɛ ɔ. Ma wɔ Sunzum paa ne oli me nyunu, maa ɔfa me fa atimbire frɛtɛɛ so.

¹¹ Ao AWURADE, wɔ dumaa ti, bɔ me ngoa nwo waen, wɔ tenenee ti, ye me kra fi amaneɛ nu.

¹² Wɔ ɔdɔ bɔ onni ngasi ne ati, nua me pɔfoɛ mɔ bɛ boso, ná kũkũ bɛ bɔ bekyi me ɔ amukoraa, ofikyɛ nde wɔ somvoɛ.