Edwein 142 - AHYERƐLƐ KRONGRON

De me fi ndaneanyeɛfoɛ mɔ sa mu

Dawide mbaeɛ mmerɛ bɔ né ɔwɔ nyɔboɛ bɔ wasi sua nu ne

¹ Metea nu mesu mefrɛ AWURADE; metea nu mefa m’abisadeɛ meto AWURADE nyunu.

² Meprapra me dwirɛ yealɛ megua ye nyunu; mefa m’amaneɛ meto ye nyunu.

³ Sɛ me kra boto a, wɔ yeɛ ɛse m’atee ɔ. Atee bɔ mefa so ne, basua me ngaen bafea wɔ so.

⁴ Sɛ menea me sa famaa so a, menwu ye kyɛ me nwo nhia ebiala; mennya afealeɛ biala, sona biala ndwene me ngoa nwo.

⁵ Ao AWURADE, mesu mefrɛ wɔ. Menwa, “Wɔ yeɛ ɛte m’afealeɛ ɔ, ɛte me bue deɛ wɔ ateasefoɛ aseɛ so.”

⁶ Tie me sufrɛ, ofikyɛ maboto paa. Pepɛ de me fi bɛ bɔ bɛtane me nye ɔ bɛ sa nu, ofikyɛ bɛ nwo yɛ se tra me.

⁷ Ye me kra fi kuku nu, amaa ɔnate so maye wɔ dumaa ayɛ. Teneneefoɛ bɛkɔpɛ me nwo bekoyia, ofikyɛ alo me paa.