Edwein 141 - AHYERƐLƐ KRONGRON

Nɔsoa mbaeɛ

Dawide dwein

¹ Ao AWURADE, mesu mefrɛ wɔ; yɛ ye ndɛ baaboka me; sɛ mesu mefrɛ wɔ a, tie me sufrɛ.

² Ma me mbaeɛ ɔyɛ kyɛ ɛyɛɛ wɔ wɔ nyunu, ná me sa bɔ mema so ne, ɔ́yɛ kyɛ nɔsoa afɔleɛ.

³ Ao AWURADE, kyire me bɔ nga ɔ, ná maa nwu bɔ odi kyɛ mefa me noa mekã ɔ.

⁴ Nnɛmaa mekakyi m’adwene mekɔ bɔne nwo, nnɛmaa mefa me nwo mebɔ amumuyɛɛfoɛ, nnɛfa mefa bɔne meyɛ me nwo buru ne nnu, nnɛmaa medi b’akɔnnɔdeɛ ne bie.

⁵ Ma teneneeniɛ ɔbo me, ná ohwi me nyunu wɔ ɔdɔ nu. Nnɛmaa bɔnefoɛ bɛfa bɛ ngoo bɛpopa me ti so, ofikyɛ mebɔ mbaeɛ daa metia b’amumuyɛɛ ne.

⁶ Sɛ bɛ mbanyi mɔ bɛfa bɛ bewura bɛ bɔ bekobua bɛ foɛ mɔ sa a, ye de bekonwu kyɛ me dwirɛ yɛ fɛ paa.

⁷ Kyɛbɔ bebubu nyɔbotaen nu bɛto bɛpete aseɛnwo ne, sɔ ala yeɛ bapete yɛ mmowue bagua ɛborɔ kumaa noa ɔ.

⁸ Nakoso, ao AWURADE Nyameɛ, wɔ yeɛ me nye la wɔ so ɔ, wɔ nu yeɛ menwati mebafea ɔ; nnɛyakyi me nwo waenbɔlɛ.

⁹ Bɔ me nwo waen fi ngaen bɔ basunzua me ne anu, ɔne bɔnefoɛ kafoli nemɔ anwo.

¹⁰ Ma bɔnefoɛ bɛ bɔbɔ bɛ ngaen ɔhye bɛ, na me de, maa nya atee nwati.