Edwein 14 - AHYERƐLƐ KRONGRON

Kwaseaa nwa Nyameɛ nne berɛ

Dawide dwein. Ɔfa mane edweinhyirelɛniɛ ne

¹ Kwaseaa kã ye wɔ ti anu kyɛ, “Nyameɛ biala nne berɛ.” Olle adwene paa, na amumuyɛɛ bɔ ɔte akyiwadeɛ yeɛ ɔyɔ ɔ, ebiala nne berɛ bɔ ye bra te sannwuu ɔ.

² AWURADE to ye nye fi nyameɛso ɔnea adasa mmaa, kyɛ aso okonwu ebie bɔ ɔse nworɛ, bɔ ɔpena Nyameɛ si atee ɔ.

³ Nakoso bɛ mukoraa bali makyebu, bɛ mukoraa adwene paa ɔnne bɛ ti anu; bɛ nu biala nne berɛ bɔ ɔyɔ bɔ ɔte paa ɔ, daabi, ko po nne berɛ.

⁴ Bɔnefoɛ amukoraa, aso nimdeɛ abɔ bɛ anaa; bɛ yeɛ bedi me mmenia aminɛ kyɛbɔ bedi aleɛ, ná bɛnzɔne AWURADE ɔ?

⁵ Berɛ, ahunundetelɛ kandinga kɔtɔ bɛ so, ofikyɛ Nyameɛ gyi teneneefoɛ aworɛ ndoatoasoɛ bɛ si.

⁶ Sona bɔ ɔyɛ anwumvo ne, ɛmɔama ye nzusuleɛ ayɛ basaa, nakoso AWURADE yeɛ ɔte ye afealeɛ ɔ.

⁷ Ao, ahaa né Yisrael ngoalelɛ wafi Sion wawa! Mmerɛ bɔ AWURADE kosa kɔfa ye maen agyapadeɛ kɔma ye ne, Yakob koli ahurusi; Yisrael nye kɔgye.