Edwein 139 - AHYERƐLƐ KRONGRON

Bɛnnwati Nyameɛ bo

Dawide dwein. Ɔfa mane edweinhyirelɛniɛ ne

¹ Ao AWURADE, aneanea me nu, na anwu me.

² Ɛse m’asetenalɛ ne me dwɔsolɛ mmerɛ; na enwu me ti anu adwene fi dedeede.

³ Ɛneanea m’atee bɔ nnate so ɔ, ɔne me nnaa nu, na wɔ nye tua bɔ meyɔ amukoraa.

⁴ Anzana mebaabukye me noa medwudwo ne po, ao AWURADE, né ɛse bɔ mebaahã amukoraa.

⁵ Abɔ me nyunu ne me si nwo waen, na afa wɔ sa ato me so.

⁶ Sɔ nimdeɛ ne, ɔyɛ me nwanwa soma; ɔwɔ anwuro soma, bɔ me sa ngora ndwu so ɔ.

⁷ Nisua yeɛ ngɔhora ngofi wɔ Sunzum nyunu ngɔhɔ ɔ? Anaakyɛ nisua yeɛ ngɔnwati ngofi wɔ nyunu ngɔhɔ ɔ?

⁸ Sɛ mefo mekɔ nyameɛso a, ɛwɔ dɔ; sɛ mesɛ me bɛen wɔ ɛborɔ a, yieee, ɛwɔ dɔ.

⁹ Sɛ mefa ngyerɛmɔ ye ndaa metu, na mekɔtena ɛpo ye noa nziɛ nziɛ dɔ a,

¹⁰ dɔ po, wɔ sa koli me nyunu, na wɔ sa famaa kotira me nu.

¹¹ Sɛ mekã kyɛ, “Amba, awosii ɔbra ɔɔkata me so, ná kanea bɔ wapɛ me nwo wayia ne, ɔkakyi kɔngɔen” a,

¹² amba, awosii po ɔnyɛ alesaleɛ mma wɔ; kɔngɔen ta hyireinn kyɛ eyia, ofikyɛ awosii te kyɛ kanea ma wɔ.

¹³ Ofikyɛ wɔ yeɛ ɛbɔle me kunu nningyein ɔ; wɔ yeɛ ɛfale m’akwaa mɔ toatoale so wɔ me ni akunu ɔ.

¹⁴ Meye wɔ ayɛ, ofikyɛ kyɛbɔ asi abɔ me ne, ɔyɛ suro yɛ nwanwa. Wɔ sa noa nnwumaa yɛ nwanwa, na me kra se ye sɔ paa.

¹⁵ Mmerɛ bɔ ɛbɔle me wɔ mvealeɛ nu ne, bɔ ɛtole wɔ bo ase ɛhyehyɛle me wɔ aseɛ bo dɔ ne, me mmowue mɔ bamvea wɔ.

¹⁶ Mmerɛ bɔ né nde mogya kokrobetoa ne, wɔ nye nwuni me. Me ngyẽa bɔ ahyehyɛ ato berɛ ama me ne, bɛhyerɛle ye mukoraa wɔ wɔ nwomaa ne anu, koraka yeɛ nu ko po ɔhyɛ ye bo ɔ.

¹⁷ Ao Nyameɛ, w’adwene ne, kyɛbɔ osi bo me ndeaseɛ so ɔ! Ɛkã bɔ nu a, kyɛbɔ osi te totohyia ɔ!

¹⁸ Sɛ meka a, ye somaa tra anweaa; sɛ meda medwɔso a, né ndɛwɔ wɔ nwo berɛ.

¹⁹ Ao Nyameɛ, sɛ ahaa ekohũhũ bɔnefoɛ, ná kodiawufoɛ bahwe bɛ nwo bafi me nwo a,

²⁰ bɛ bɔ bɛkekã musue dwirɛ betia wɔ, ɔne wɔ pɔfoɛ mɔ bɔ bɛbɔ wɔ dumaa mbaen mbaen ɔ!

²¹ Ao AWURADE, bɛ bɔ bɛpɔ wɔ ne, aso membɔ bɛ? Na bɛ bɔ bedwɔso betia wɔ ne, aso bɛ nwo nyɛ me ahi?

²² Mekyi bɛ kɔkɔkɔkɔ; mebu bɛ me pɔfoɛ mɔ.

²³ Ao Nyameɛ, neanea me nu, ná nwu m’ahone nu dwirɛ; so me nea, ná nwu me ti anu adwene.

²⁴ Nea sɛ bra tɛɛ bie wɔ me nu a, na di me nyunu fa me fa atee bɔ ɔla berɛ afebɔɔ ne aso.