Edwein 137 - AHYERƐLƐ KRONGRON

Yisraelfoɛ sũ wɔ Babilɔn asue noa

¹ Babilɔn asue mɔ noa, berɛ yeɛ yɛtenane ase yɛsuni ɔ, mmerɛ bɔ yɛkayele Sion ɔ.

² Asue noa mmakaa nemɔ aso yeɛ yɛfale yɛ sangoo mɔ yɛsinzele ɔ.

³ Ofikyɛ bɛ bɔ bɛhyele yɛ nnure ne, berɛ yeɛ besele yɛ kyɛ yɛto dwein ɔ, na bɛ bɔ bɛteetee yɛ ne, besele yɛ kyɛ yɛgyegye bɛ nye. Bɛnwa: “Sion dwein ne, ɛ́mɔto ko behyire yɛ!”

⁴ Ɔkɔyɛ sɛɛ né yato AWURADE nwo dwein, wɔ maen foforɛ bie aso?

⁵ Ao Yerusalem, sɛ mema me wora fi wɔ a, ma me sa famaa ɔnwenwe!

⁶ Sɛ mangaye wɔ a, ma me temverema ɔmata me nnaalɔ, sɛ manguro Yerusalem dwirɛ mandra nikyee biala bɔ ɔma me anigye paa hɔ a!

⁷ Ao AWURADE, kaye bɔ Edomfoɛ bɛyɔle ye kyẽa bɔ Yerusalem bɔle ne, na tua bɛ so kerɛ; kyɛbɔ bɛhane kyɛ, Ɛ́mɔbubu ye bégua ase! ɛ́mɔbubu ye bégua ase! Ɛ́mɔbubu ye bégua ase maa ɔɔhã ye fapem!” ne.

⁸ Ao Babilɔn awa brasua bɔ bɛbaasɛkye wɔ pasapasa ɔ, bɔ okotua wɔ so kerɛ wɔ bɔ afa ayɛ yɛ ne anwo ne, okonya saleɛ!

⁹ Bɔ ɔkɔhye wɔ mma mmaa mmaa kɔte bɛ ti kɔbɔ nyɔbotaen so ne, okonya saleɛ!